1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

آلمان او نړۍ

په فرانسه کښي پر برقې باندي بنديز ولگيدی

د فرانسې د کورنيو چارو وزارت درې اونۍ وخت ته ضرورت درلودی تر څو پوليسو ته د برقې د منع کولو قوانين وړاندي کړي. د مسوولينو ترڅنګ دغه مقرره حتي اسلامي استازو ته هم واورول سوه.

په فرانسه کښي مسلماني مېرمني

په فرانسه کښي مسلماني مېرمني

دا ددې ښکارندوی ده چي موضوع په کومه اندازه حساسه ده. په ۹صفحو کښي پوليسو ته د برقې منع کولو فرمان ورکړل سوی دی.

د فرانسې د کورنيو چارو وزارت وايي چي په لومړی قدم کي موضوع د حجاب اغوستونکو ښځو ته سزا ورکول نه دي، بلکي هدف دا دی چي دوی په دې باوري کړل سي چي برقه يا نقاب ليري کړي.

« په دې قانون کي په ښکاره توګه يادونه سوې ده چي د قانون څخه سرغړونه بايد ددې سبب نه سي چي يو څوک دي د پوليسو په و سيله بندي او يا هم مجبور کړای سي چي برقه ليري کړي. خو که چيري د خپلي څيرې د ښکاره کولو څخه انکار وکړي نو تردې وروسته دي موضوع څارنوالۍ ته وړاندي سي.»

د فرانسې دولت په اګاهانه توګه د احتياط څخه کار اخلې، ځکه چي دولت د مسلمانانو په وړاندي د تبعيض د شکايت څخه ويره لري.

سربيره پردې د کورنيو چارو وزارت، د مسجدونو تر څنګ پوليس د کنترول کولو څخه منع کړي دي تر څو په دې توګه د مذهب آزادي وساتلای سي. په دې قانون کي پوليسو ته لارښونه سوې ده چي د زور پر ځای د مفاهمې څخه کار واخلې.

د پوليسو د صنفي اتحاديې مشر نيکولاس کومتي په دي باور دی چي د پاريس په شاوخوا کي ددې قانون پلې کول به د ستونزو سره مخامخ سي.

« سړی کولا سي دا تصور وکړي چي په ځينو برخو کي داسي کسان سته چي نه غواړي دا قانون رعايت کړي. چي دا کيدای سي د شخړييز وضعيت او حتي د احتجاجونو او نا امنيو سبب سي.»

که يوه ښځه د کور څخه بهر خپل ټول بدن په حجاب کي ونغاړي د هغي سزا به 150 ايورو او د تابعت په اړه د يو کورس لوستل وي.

او هغه سړی چي خپله ښځه د برقې يا نقاب په اغوستلو مجوروي. هغه بايد يوې لوي جريمې ته تيار و اوسي. يعني تر30000 ايورو او يو کال بند په سزا به محکوم سي.

د نيکولاس په څير د پوليسو ځيني استازي په دې باور دي چي د دې خبري ثابتول چي کوم سړی خپله ښځه د نقاب او يا حجاب په اغوستلو مجبوره کړي، ګرانه ده . نومړی ددي قانون پلي کول چي په فرانسي کي به تقريباً 2000 ښځي په بر کي ونيسي اغيزمن نه بولۍ.

البته د فرانسې زياتره وګړي ددې قانون پلويان دي، او د فرانسې په پارلمان کي هم اکثرو د حجاب د منع کولو په حق کي رايه ورکړې ده.

دا يو د هغه سياسي حالتونو څخه دی چي نيکولا سرکوزي په کښي د خلکو د ملاتړ څخه په پراخه پيمانه برخه من دی. د هغه تګلاره ښکاره ده.

سرکوزي د انخاباتو څخه يو کال وړاندي د داسي موضوعاتو څخه ګټه اخلي چي د عامو وګړو د دلچسپۍ وړ وي. داسي موضوګانې په 2007 کال کي هم د نوموړي د کاميابۍ سبب سوې.

آنه کريستيان/ شمس الرحمن

کتونکی: نجيب الله زيارمل