1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

آلمان او نړۍ

په شمالي افريقا کښي تحولات خطر نه بلکې يو چانس دی

لويديز بايدخپل فکر ته تغير ورکړي . د شمالي افريقا او منځني ختيځ تحولات د نوي دريز نيولو ته اړتيا لري ، نه يوازي په سياسي ، بلکه اقتصادي برخه کښي هم.

د قذافي د حکومت پر ضد لاريونونه

د قذافي د حکومت پر ضد لاريونونه

په تونس او مصر کښي اساسي تغيرات ، په لېبيا کښي لا نه کاميابه سوي انقلاب او په يمن ، بحرين ، عمان او مراکش کښي د خلګو احتجاجونو ټوله نړۍ په حيرت کښي واچوله او د لويديز سياست يې تر سوال لاندي راوستي.

د امريکا متحده ايالاتو او په اروپا کښي د هغه متحدينو څو لسيزي د منځني ختيځ او شمالي افريقا د مستبدو رژيمو څخه ملاتړ کړی دی.

واشنګټن په خليج کښي يوه سلسله نظامي اډې جوړي او اروپايانو بيا د بارسلونا د پروسې په چوکاټ کښي د ۱۵ کلو راهيسي د شمالي افريقا سره د ډيرو نژدې روابطو درامنځته کيدو کوښښ کړی دی.

دغه منطقه د لويديز دپاره د جغرافيايي موقعيت د لحاظه ډير اهميت لري. خصوصاً مصر چي د افريقا او آسيا تر منځ لار ده ، د پيړيو پيړيو راهيسي ډير مهم رول لري.

د امريکايانو دپاره هم مصر په منځني ختيځ کښي يو مهمه ستراتيژيکي نکته ده. د قاهرې حکومت د اسرايلو سره د سولي د رامنځته کيدو ، د تندلارو مسلمانانو سره د مبارزې او سويس کانال ته د لار پيداکيدو تضمينوکي دي.

په همدې دليل په اول سر کښي امريکايانو د مصر انقلاب ته په ډير شک او ترديد سره کتل او ددغه هيواد د امنيت او ثبات خبره يې کوله ، چي ددوی دپاره ستراتيژيکي اهميت لري.

په برلين کښي د عصري شرق د مرکز څخه د مصر کارپوهه سونيا هيګازي د شمالي افريقا په تحولاتو کښي چانسونه نسبت تهديدو ته ډير ويني.

« که موږ دي ته وګورو چي اروپايي ټولني د ۱۹۹۵ کال راهيسي د بارسلونا د پروسې په چوکاټ کښي په دغه سيمه کښي څشي پلاس راوړي دي ، يعني په سياست کښي د خلګو د ګډون ، د مالي امکاناتو د ښه ويش ، د مهاجرينو د سم سياست او د بشر د حقوقو مراعت، په همدغو ټولو کښي لويديزښه ملګري نه درلودل او ځکه نو د بارسلونا د پروسې په چوکاټ کښي څه پلاس رانه غلل. خو که هلته انتخابي حکومتونه رامنځته سي ، دغو هدفونو ته سړي په آسانۍ سره رسيدلای سي.»

دا هغه وخت کيدلای سي چي اروپايان دې تيارسي ، چي په شمالي افريقا کښي خپلو دوستو او ملګرو هيوادوته مساوي حقوق ورکړي ، او د محصولاتو دپاره يې خپلو بازارو ته لار خلاصه کړې.

بيتينا/ محمد قاسم نوري

کتونکی: نجيب الله زيارمل