1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

آلمان او نړۍ

په سویس کانال کې ترهګریز برید ناکامه شو

مصري چارواکو ویلي دي په سویس کنال کې د شنبې په ورځ پر یوې لویې بیړۍ باندې یو ترهګریز برید ناکامه شوی دی. د سویس کانال د بیړیو له لارې د تجارتي مالونو د لیږد په برخه کې نړیوال ارزښت لري.

د سویس کانال

د سویس کانال

د رویترز خبري آژانس د سویس کانال د امیرالبحر مرستیال مهاب ممیش، له خوا د یوه خپور شوي رپوټ په حواله لیکلي دي چې د دغه برید هدفت د سویس د کانال له لارې د سوداګریزو مالونو د تګ راتګ پر وړاندې د خنډ رامنځته کول وو.

سویس کانال د لویو بیړیو په واسطه د سوداګریزو مالونو د لیږدولو په برخه نړیوال اهمیت لري. د اوبو د دې لارې ساتنه او حفاظت د مصري وسله وال پوځ پر غاړه ده. د ښاغلي ممیش له خوا په خپرې شوې بیانیه کې دا نه دي ویل شوي چې په دې سیمه کې د څه ډول برید د ترسره کیدو هڅې شوې وې.

د بیړۍ چلونې سکتور اړوندې ادارې دوو تنو کارکونکو د خپل نوم د نه اخیستلو په شرط د رویترز خبري آژانس ته ویلې دي چې د دوو قوي چاودنو غږونه هغه وخت واوریدل شول چې پر کانتینرونو باره یوه بیړۍ له دغه کانال څخه د تیریدو په حال کې وه.

وروسته بیا د شنبې په ماښام د سویس کانال چارواکو د پېښې په اړه د توضیحاتو ورکولو پر مهال وویل چې د دې شنډ کړای شوې برید یو تن عامل غوښتل چې د سویس د کانال له لارې تیریدونکې بیړیو د تګ راتګ مخه ونیسي.

د امیرالبحر د مرستیال په خبره په کانتینرونو بار دغه بیړۍ چې د ترهګرو له خوا يي د په نښه کیدو هڅې شوې د لاتینې امریکې د«پاناما» هیواد بیرغ لاره. دا بیړۍ Cosco Asia نومیږي. ممیش زیاته کړې ده چې په بیړۍ کې بار کانتینرونو ته هیڅ زیان نه دی رسیدلی.

د امیرالبحر مرستیال ویلې دي چې د سویس د کانال دواړو خواو ته د لا زیاتو امنیتي تدابیرو د نیولو امر شوې دی. د رویترز خبري آژانس په خپل دې رپوټ کې لیکلې دي چې تر اوسه پورې دا نه ده روښانه شوې چې آیا دا به د جولای د میاشتې په دریمه نیټه د پوځ له خوا د دغه هیواد د ولسمشر محمد مرسي، د لیرې کولو له قضيي سره تړې پېښې وې او که نه.

د محمد مرسي تر راپرځیدو وروسته په مصر کې پراخه مظاهرې روانې دي. د دغو مظاهرو پر وړاندې د امنیتي ځواکونو له خوا د زور د استعمال په پایله کې تر اوسه پوری له ۱۰۰۰ څخه زیات انسانان وژل شوې.

DW.COM