1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

آلمان او نړۍ

په سوریې کې د نوو عام وژنو خبر ورکړل شوی دئ

د بشري حقونو د فعالیونو په خبره د چهارشنبې په ورځ د القبیر په کلي کې چې د حما په ولایت کې پروت دئ لږ تر لږه ۸۷ کسان وژل شوي دي. د سوریې دولتي تلویزیون دغه خبر یوه ادعا، توطعه او یو شیطاني جنایت بللی دئ.

د سوریې د ملي شورا یوه ویاند د فرانسې خبري آژانس ته ویلي دي چې د بشارالاسد رژیم پورې تړلو سرتیرو او نیمه سرتیرو د القبیر په کلي کې د ماشومانو او ښځو په گډون شاوخوا ۱۰۰ کسان وژلي دي.

د فرانسې د خبري آژانس په خبره په سوریې کې د بشري حقونو د څار یوه مرکز د قربانیانو شمیره لږ تر لږه ۸۷ کسان ښودلې ده. دې مرکز ویلي دي چې پوځ لومړی دغه کلی د لاسي بمونو تر برید لاندې نیولی دئ او وروسته دې کلي ته ننوتلي دي او د کلي اوسیدونکي ئې په چړو او مرمیو وژلي دي.

دا په داسې حال کې ده چې د المان خبري اژانس د سوریه د بشري حقونو د څار د دفتر په حواله لیکلي دي چې د چهارشنبې په شپه په سوریه کې لږ تر لږه ۲۳ کسان وژل شوي دي. په سوریه کې د سمیه ییزو همکاریو کميتې وایي چې په دې پېښه کې لږ تر لږه ۷۸ کسان وژل شوي دي.

په سوریه کې د بشري حقونو د څار ادارې او ملي شورا د ملگرو ملتونو له څارونکو څخه د دغې پېښې د څیړنې غوښتنه کړې ده. د سوریې حکومت په دې وژنه کې هر ډول ښکیلتیا رد کړې ده.

په هغه بیانیه کې چې د سوریې د دولتې تلویزیون له خوا خپره شوې ده راغلي دي هغه څه چې په ځینو رسنیو کې د القبیر د پېښې په اړه خپاره شوي دي په بشپړه توگه غلط دي. دې تلویزیون ادعا کړې ده چې یوې ترهگرې ډلې د حما په سیمه کې یو جنایت تر سره کړی دئ چې پکښې نهه کسان وژل شوي دي.

د سوریې دولتي تلویزیون ادعا کړې ده چې دغه جنایت په قصدی توگه د سوریې په هکله د ملگرو ملتونو د امنیت د شورا تر غونډې مخکې تر سره شوی دئ چې د سوریې رژیم تر فشار لاندې راشي.

د سوریې د ملي تلویزیون په خبره په دې کلي کې ښځې او ماشومان په تړلو لاسونو او پښو وژل شوي دي. دې تلویزیون زیاته کړې ده چې له هغه وروسته چې د القبیر د کلي اوسیدونکو له دولت څخه مرسته وغوښته د سوریې پوځ پر دې ځای باندې برید وکړ.

د ملگرو ملتونو د معلوماتو له مخې د مې په ۲۵مه نیټه د حوله په ښار کې د ښځو او ماشومانو په گډون لږ تر لږه ۱۰۸ کسان ووژل شول. د سوریې حکومت په دې پېښه کې هم خپل هر ډول ښکیلتیا رد کړې ده او هغه ئې د وسله والو ترهگرو کار بللی دئ.

د چهارشنبې په ورځ په استانبول کې د ۱۶ هیوادونو استازو د سوریې د وضعیت په اړه خبرې اترې وکړي. په غونډه کې چې د بهرنیو چارو د وزیرانو په کچه جوړه شوې وه موافقه وشوه چې بشارالاسد نور راتلونکې نه لري او باید په سوله ییزه توگه واک ولیږدوي.

د سوریې له پاره د ملگرو ملتونو ځانگړی استازی کوفي عنان، غواړي د پنجشنبې په ورځ د ملگرو ملتونو په غونډه کې د سوریې د وضعیت په اړه معلومات ورکړي.

آژانسونه/ مسعود جهش
کتونکی: عبدالباري حکیم