1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

آلمان او نړۍ

په سوريه کي ډله ييز قبر موندل سوی

په سوره کي فعالان وايي چي په «دير الزور» ولايت کي ډله ييز قبر ميندل سوی دئ. د دوی په خبره په دغه قبر کي چي تر ۲۳۰ زيات انسان پراته دي، په الشعيطات سني قبيلې پوري اړه لري چي د «اسلامي دولت» ډلي له خوا وژل سوي دي.

د سوريې د فعالانو د معلوماتو له مخي په سوريه کي د «اسلامي دولت» ډلي له خوا د وژل سوو انسانانو داسي ډله ييز قبر کشف سوی دئ، چي تر ۲۳۰ زيات انسانان پکښي ښخ سوي دي.

د سوريې د بشري حقونو د څارني ادارې ويلي دي چي په دې سره د سږکال په دوبي کي د هغو قربانيانو شمېر زيات سوی چي د «اسلامي دولت» ډلي له خوا له عراق سره په سرحد کي د سوريې په «دير الزور» ولايت کي وژل سوي دي. د دوی په خبره دغه شمېر اوس ۹۰۰ انسانانو ته رسيږي.

دغه ډله ييز قبر د وژل سوو کسانو د کورنيو د غړو له خوا د «دير الزور» ولايت په ختيځ کي په يوه دښت کي موندل سوی دئ.

د فعالانو د معلوماتو له مخي په دغه قبر کي د ښخ سوو انسانانو ډېری ملکيان دي. دا هم روښانه سوې ده چي د دوی ډيری اعدام سوي دي.

په دغه ولايت کي د الشعيطات سني قبيلې په سوونو انسانان وايي چي د کورنۍ غړي ئې ورک دي. الشعيطات سني مسلمانان دي چي د «اسلامي دولت» ډلي مخالف دي. افراطي ډلي اسلامي دولت د دغي قبيلې چي د عراق په شمال ختيځو سیمو کي پراته په سونو انسانان په غچ اخيستونکو يرغلونو کي وژلي دي.

اسلامي دولت ډلي اعلان کړی دئ، چي هغه څوک چي د دوی پروړاندي دريږي وژل کيږي به. دغي ډلي دغه راز په عراق کي د يزيدانو پر وړاندي هم سخت زورزياتی وکړ او لا روان دئ.

دوی په عراق کي يزيدانو ته اعلان وکړ، چي يا به مسلمانان کيږي يا وژل کيږي. دغي افراطي ډلي د يزيدانو په سوونو نارينه ووژل او ښځي ئې له ځانونو سره بوتللې.

اسلامي دولت ډله اوس د سوريې په شمال او ختيځ کي او دغه راز په عراق کي ډېري سمي په خپل کنترول کي لري.

په لندن کي د سوريې د بشري حقونو د څار سازمان د سوريې «د معتبرو سرچينو» په حواله په دغه هيواد کي د بشري حقونو په اړه راپورونه خپروي.

دغه سازمان چي د سوريې د واکمن بشارالاسد له مخالفانو سره اړيکي لري د دغه هيواد د يوې پراخي معلوماتي شبکې څخه خپل راپورونه راټولوي.

خو په سوريه کي د کورنی جنگ په سبب تر اوسه پوري د خپلواکو سرچينو له خوا دغه شان خبرونه تائيد سوي نه دي.