1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

اروپا ته مهاجرت

په جرمني کي د مهاجرو ادغام څو لسيزي وخت نيسي

د جرمني جمهوررئيس فرانک والتر شټاين ماير په ټولنه کي د مهاجرو ادغام يوه «ستره دنده» بللې. هغه په يوه تلويزيوني مرکه کي د ټولني عيني واقعيتونو ته اشاره کړې او له نوو راغلو ئې غوښتي دي چي د جرمني قوانينو ته درناوی وکړي.

د جرمني جمهوررئيس فرانک والتر شټاين ماير له (ZDF) تلويزيون سره په مرکه کي ويلي دي چي د مهاجرو د ادغام له پاره يوه صادقانه ټولنيز بحث ته اړتيا ده. هغه په دغه مرکه کي ويلي دي: «موږ بايد تر ټولو موضوعاتو دمخه خلکو ته ووايو چي ادغام يو ستر کار دئ چي کیدای سي لسيزي وخت ونيسي.»

شټاين ماير د جرمني د پخواني جمهوررئيس يوآخيم گاوک هغه جمله تکرار کړه چي ويلي ئې ول: «زړه مو لوی خو امکانات مو ختمېدونکي دي». خو وويل چي د پخواني جمهوررئيس دغه خبري په دې معنی نه دي چي خوندي توب ته د اړو کسانو د ساتلو له پاره دي حداکثر حد وټاکل سي. د هغه په خبره مهم دا دي چي په ټولنه کي د قطب بندۍ مخه ونيوله سي: «له يوه اړخه ځيني وايي چي د مهاجرو ادغام ستونزمن نه دی. بلي خوا ته بيا داسي کسان سته چي يوازي پر ستونزو باندي ږغيږي.»

د جرمني د جمهوررئيس په خبره، ځيني منتقدان فکر کوي چي گويا سياستوالو د مهاجرو د ادغام په برخه کي خلک يوازي پرې ايښي دي، خو هغه دې قضې ته داسي نه گوري.

شټاين ماير د خپلو خبرو په يوه برخه کي څرگنده کړه چي د هيواد ځينو ايالتونو د سفر پرمهال متوجه سوی دئ چي له مهاجرو سره د مرستي، له هغوی سره د ژبي په زده کړه او حرفوي کورسونو کي ډېر «ابتکارونه او فعاليتونه» سته.

هغه دغه راز له هغو مهاجرو چي تازه د جرمني ټولني ته راغلي دي وغوښتل: «زموږ عنعناتو ته احترام وکړئ او تر ټولو دمخه زموږ په ټولنه کي حاکمو قوانينو ته احترام وکړئ.»

زموږ له ارشيف څخه:

DW.COM