1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

سيمه

په تهران کي د ناپېيلو هيوادونو غونډه پيل سوه

په تهران کي د ناپېيلو هیوادونو دوه ورځنۍ غونډه پرانیستل شوه. په دې غونډه کي د ۱۲۰ هیوادونو مشرانو او لوړ پورو استازو ګډون کړی دﺉ.

له دې سره ښایي ایران غواړي دا خبره ثابته کړي، چي په نړیواله کچه یوازي نه دئ. په پلان کې ده چې د ایران مذهبي مشر ایت الله علي خامنيي او د مصر ولسمشر محمد مرسي، به د ناپیلو هیوادونه غونډه پرانیزي. مصر اوس د ناپېيلو هیوادونو د سازمان دوره يي مشري ایران ته سپاري.

د ایران دولتي تلویزیون د غونډي تالار ښودلی دﺉ چي د د تهران په یوه ډیره امنيتي سيمه کي دﺉ. په دغه غونډه کي د پرمختلونکو هیوادونو استازو ګډون کړی دﺉ.

د افغانستان، لبنان، پاکستان، سوډان، زیمبابوې ولسمشرانو، د فلسطین مشر او قطر امیر په دې غونډه کي ګډون کړی دﺉ. د ایران، هندوستان او سوريې لومړیو وزیرانو هم په دې غونډه کي ګډون کړی دئ.

د شمالي کوریا تشریفالي مشر او د پارلمان رئیس کیم یونگ نام، هم د ناپېيلو هیوادونو په غونډه کي د گډون له پاره ایران ته رسېدلي دي.

په ټولیز ډول د ناپېيلو هیوادونو د سازمان د ۱۲۰ غړو له ډلي څخه د ۲۹ هیوادونو ولسمشران، دې غونډې ته د گډون له پاره ورغلي دي. د پاته هیوادونو نور لوړ پوړي چارواکي په دې غونډه کي گډون کوي.

تمه کېده چي د بولیوا، ازربایجان، گانا او کویټ ولسمشران به هم د ناپېيلو هیوادونو په غونډه کې د گډون له پاره تهران ته ولاړ شي خو هغوی و نه شوای کولای چي د ناپېيلو هیوادونو پرانیستونکي غونډي ته ځان ورسوي.

د ناپېيلو هیوادونو سازمان د سړې جگړې پر مهال رامنځته شو. په دغه سازمان کي هغه هیوادونه شامل ول، چي خپل ځان ئې د مسکو یا واشنگټن په بلاک پوري تړلی نه باله.

تر هغه وروسته دغه سازمان د پرمختلونکو هیوادونو له پاره کار کوي او له ملگرو ملتونو څخه غواړي چي د امنیت شورا صلاحیتونه محدود کړي. همداراز دغه سازمان د فلسطیني دولت د جوړیدو غوښتونکی هم دئ.

د ناپېيلو هیوادونو سازمان همداراز پر یو شمیر پرمختلونکو هیوادونو لکه ایران، کیوبا، سوریه، شمالي کوریا او زیمبابوي باندي د امنیت د شورا بندیزونه غندي.

په تهران کې د ناپېيلو هیوادونو د غونډي تر ټولو مهمه خبره په غونډه کي د ملگرو ملتونو د د عمومي منشي بان کي مون، گډون دئ. له بان څخه غوښتل شوي ول، چي په دې غونډه کي گډون و نه کړي خو هغه ویلي دي چي له وخت څخه په استفادې سره به د ایران له چارواکو سره رغوونکي خبري اتري وکړي.

آژانسونه/ مسعود جهش
کتونکی: نجیب الله زیارمل