1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

آلمان او نړۍ

په امريکا کي د افغانستان په اړه نوی کورنی بحث

د امريکا په متحده ايالاتو کي اوس پر دې باندي بحث روان دی چي د افغانستان څخه دي د سرتيرو را ايستل ژر تر ژره تر سره سي. ددې کار يو عامل په کلنۍ بوديجه کي ستر کسر دی.

سناتور جان کيري

سناتور جان کيري

واشنگټن پوست ورځپاڼه ليکي چي اوس په امريکا د افغانستان څخه د ژر تر ژر وتلو بحث راپورته سوی دی.

ورځپاڼه ليکي چي د امریکا د مرستيال ولسمشر جو بايډن نژدې لوړي پوړي چارواکي غوښتنه کوي چي، د افغانستان څخه د امريکايي عسکرو په ايستلو کي د بيړي څخه کار واخلي.

په واشنگټن کي ددې بحث يو لامل د هغه هيواد د کلنۍ بودېجې د مصارفو ډيريدل دي چي يو مالي بحران يې را منځ ته کړی.

د امريکا د متحده ايالاتو په کلنۍ بوديجه کي يوازي د افغانستان د ماموريت دپاره ۱۱۳ ميليارده ډالره ځانگړي سوي چي دا په بوديجه کي د لوی کسرعامل بلل کيږي.

پدې هکله د هغه هيواد ولسمشر باراک اوباما لا د تيري مياشتي په پېل کي په يوه تلويزيوني مرکه کي وويل:

« موږ کولای سو افغان ځواکونه داسي و روزو، چي هغوی په خپل هيواد کي ثبات ټنگ کړي. پدې توگه به موږ خپله پوره توجه القاعدې او هغه گواښ ته واړو چي د دغي ډلي لخوا زموږ هيواد ورسره مخامخ دی. خو حتمي نده چي موږ په افغانستان کي د اوږده وخت له پاره په هغه حجم کي پاته سو لکه اوس چي يو.»

اوباما غواړي چي د جولای په مياشت کي د افغانستان څخه د خپلوعسکرو ايستل پېل او د 2014 م کال ترپايه بشپړه کړي.

په امريکا کي پر دې باندي بحث روان دی، تر څو د افغانستان څخه د سرتيرو په ايستلو کي بيړه وکړي تر څو هلته په پوځي لگښتونو کي سپما وکولای سي.

د هغه هيواد د دفاع وزير رابرټ گېټس د پوځي بوديجې پر موضوع يوې پارلماني کمېټې ته د خبرو پر وخت د دغه سرعت مهموالی ومنی:

«د بوديجه کي د سپما کيلي د افغانستان څخه د پوځونو ايستل دي»

د امريکا د پارلمان دواړي جرگې اوس د افغانستان د پوځي ماموريت د مصارفو لږول غواړي. په روان کال کي د افغانستان ماموريت ته ۱۱۳ ميليارده او په راتلونکي کال کي ۱۱۰ ميليارده ډالره ځانگړي سوي دي.

سناتور جان کېري چي د امريکا د ديموکراټ گوند غړی او د بهرنيو چارو د جرگه گۍ مشردی وايي:«موږ بايد همېشه د ځان څخه پوښتنه وکړه، چي ايا په افغانستان کي زموږ ستراتيژي اوږدمهاله ده.»

د متحده ايالتونو پخوانی ډپلومات ريچارډ هاس وايي:

« افغانستان پداسي لوړه کچه سره د امريکا اقتصادي، پوځي، انساني، ډيپلوماتيک او سياسي وسايل جذبوي يا په مصرف رسوي چي دغه مصارف هر کال 120 ملياردو ډالرو ته رسيږي. د امريکا د بشپړه دفاعي بوديجې هر 7م ډالر په افغانتسان کي مصرفيږي. د دغه ډول مصارفو له پاره هيڅ منطقي دليل نسته.»

دغه ټوله بحثونه نوي ندي. خو د بحث نوی اړخ دا دی چي د لومړي ځل له پاره په بوديجه کي د سپما موضوع د افغانستان څخه د امريکايي پوځ د ژر تر ژره ايستلو سره تړل کيږي.

آژانسونه/ احمد ولي اڅکزی

کتونکی: نجيب الله زيارمل