1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

په افغانستان کې سختو واورو لږ تر لږ ۳۷ کسان وژلي

یوه افغان چارواکي د یکشنبې په ورځ ویلي دي چې د افغانستان په بیلابیلو برخو کې د سختې واورې اوریدو، بارانونو او واورې ښویدنې له کبله لږ تر لږه ۳۷ کسان وژل شوي دي. حکومت د یکشنبې ورځ عمومي رخصتي اعلان کړې.

د افغانستان د طعبیي افاتو پر ضد د مبارزې ادارې ویاند عمر محمدي، د آلمان له خبري آژانس په په مرکه کې زیاته کړې ده چې پر دې سربیره د افغانستان په ۲۵ ولایتونو کې لږ تر لږه ۱۶ تنه نور کسان ټپیان شوي هم دي.

د دغې ادارې د شمیرو له مخې ۵۷۱ څاروي د خرابې هوا له کبله وژل شوي او ۱۸ کورونه بیا ویجاړ شوي دي.

عمر محمدي ویلي چې تر ټولو زیات تاوان په شمالي ولایتونو کې رامنځ ته شوی دی: «په بدخشان او سرپل ولایتونو کې هغه وخت ۱۶ کسان ووژل شول او تر ۱۰ ډیر نور ټپیان شول چې د واورې ښویدو یو شمیر کورونه لاندې کړل.»

اوس د واورې له کبله ډیر شمیر سړکونه، په ځانګړې توګه د افغانستان په شمالي او مرکزي ولایتونو کې تړلي پاتې دي. د افغانستان د طبیعي افاتو پر ضد مبارزې ادارې ویلي دي چې له تیرې اوونۍ راهیسې په سالنګ کې ۳۳ د واورې ښویدو پیښې رامنځ ته شوې دي.

افغان سیمه ییزو رسینو خبر ورکړی دی چې د بامیان ولایت په غرونو کې په لسهاو موټر له خپلو سپرلیو سره په واورو کې بند پاتې دي. په دې ولایت کې په وروستیو شپو کې د هوا درجه منفي ۱۵ ته رسیدلې ده.

افغان حکومت د یکشنبې ورځ عمومي رخصتي اعلان کړه. په دې ورځ په کابل کې د افغانستان نړیوال هوایي ډګر هم تړلی وو.

DW.COM