1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

په افغانستان کي درې ورځي ملي ماتم اعلان سو

افغان ولسمشر محمد اشرف غني په خپل هیواد کي د واورو ښوېدو په پيښو کي د په لسونو انسانانو د مړيني له کبله درې ورځنی ملي ماتم اعلان کړی دئ. ويل کيږي چي په دغه طبيعي ناورين کي تر ۲۳۳ زيات انسانان وژل سوي دي.

افغان ولسمشر محمد اشرف غني په هيواد کي د دروو ورځو ملي ماتم اعلان کړی دئ او په پنجشېر ولايت کي ئې د واوري ښوېدني قربانيانو له کورنيو سره ئې د ۲۰ ميلينونو افغانيو مرستي لارښوونه کړې ده.

د پنجشېر امنيې قوماندان نن ويلي دي چي له وارو څخه د را ايستل سوو انسانانو د جسدونو شمېر اوس ۱۸۴ ته رسېدلی دئ.

عبدالعزيز غيرت ويلي دي ژغورونکي ډلي په څلورمه ورځ هم تر وارو لاندي په قربانيانو پيسې گرځي. د غيرت په خبره دوې ژغورونکي ډلي اوس هم په جسدونو او هغو کسانو پيسي چي کيدای سي تر واوري لاندي بند پاته وي گرځي.

د هغه په خبره د قربانيانو شمېر کيدای سي تر دې نور هم ډېر سي.

افغان ولسمشر او د هغه اجرائيه رئيس د جمعې په ورځ د وارو ښوېدني سيمو تر ليدني وروسته له نړيوالي ټولني څخه د مرستي غوښتنه کړې ده.

غنی له افغان او نړيوالو هوايي ځواکونو څخه غوښتي دي چي سيمي ته د هوا له لاري مرستي ورسوي.

د افغانستان په بېلابېلو سيمو کي د سختي واوري د اورښت له کبله تر اوسه پوري ۲۳۳ انسانان وژل سوي دي. د دغو قربانيانو ډېره برخه په پنجشېر کي وه او دغه راز په بدخشان کي ۲۵، په پروان کي ۱۳، په بغلان کي ۳ په بادغيس کي ۴ او په باميانو کي هم ۴ کسان وژل سوي دي.