1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

په اسلام آباد کې د کابل سفیر د کورنیو چارو وزارت سرپرست شو

په اسلام آباد کې د کابل سفیر محمد عمر دواودزی، د یکشنبې په ورځ د افغانستان د کورنیو چارو وزارت د سرپرست په توگه وټاکل شو. تر دې مخکې ښاغلي داودزي ویلي وو چې امکان لري هغه په راتلونکو ولسمشریزو ټاکنو کې خپل ځان ونوموي.

محمد عمر دواودزی

محمد عمر دواودزی

محمد عمر دواودزی تر دې مخکې په ایران کې هم د افغانستان سفیر پاتې شوی دی،

محمد عمر دواودزی تر دې مخکې په ایران کې هم د افغانستان سفیر پاتې شوی دی،

په اوسني وخت کې هغه په اسلام آباد کې دی چېرته چې هغه له ۲۰۱۱ کال راهیسې د افغانستان د سفیر په توگه دنده ترسره کوي. ښاغلي داودزي د ولسمشر کرزي د اداري چارو د رئیس په توگه هم دنده ترسره کړې ده.

د افغان ولسمشر یوه ویاند د کورنیو چارو وزارت د سرپرست په توگه د دواودزې د گومارل کیدو خبر تایید کړی دی. په دې ترتیب به نو داودزی د پارلمان د اعتماد رایې ترلاسه کولو پورې د افغانستان د کورنیو چارو د وزارت د سرپرست په توگه کار وکړي.

تر دې مخکې د افغانستان د کورنیو چارو پخواني وزیر مجتبی پتنگ، ته د ولسي جرگې له خوا د نه اعتماد رایه ورکړل شوی وه او په دې ترتیب سره له دندې گوښه شوی وو. خو ولسمشر کرزي هغه وخت د پارلمان پر دغې پریکړې باندې نیوکه کړې وه او مجتبی پتنگ یې د کورنیو چارو وزارت د سرپرست په توگه گومارلی وو. کرزي هغه وخت ویلي وو چې د مجتبې پتنگ د سلب اعتماد کیدو په برخه کې به له سترې محکمې څخه مرسته وغواړي.

په افغانستان کې په ۲۰۱۴ کال کې ولسمشریزې ټاکنې کیږي. د افغانستان د اساسي قانون له مخې ولسمشر کرزی نه شي کولای چې خپل ځان د دریم ځل له پاره په ولسمشریزو ټاکنو کې ونوموي. هغه څو وارې ټینگار کړی دی چې په راتلونکو ټاکنو کې به د هیڅ یوه نوماند ملاتړ و نه کړي.

ښاغلی داودزی ۵۵ کاله عمر لري او تر دې مخکې د حزب اسلامي ډلې غړی پاتی شوی دی. هغه د ملگرو ملتونو له پاره هم کار کړی دی. داودزي په ډیرو سختو شرایطو کې په پاکستان کې د افغانستان د سفیر په توگه دنده ترسره کړه. د هغه د کاري دورې پر مهال د افغانستان او پاکستان اړیکې تر بل هر وخت ډیرې ترینگلې وې. په ۲۰۱۰ کال کې ولسمشر کرزي هغه خبرونه هم تایید کړي ول چې داودزي هغه مهال ایران ته د افغانستان د سفیر په توگه له دغه هیواد څخه پیسې ترلاسه کړې وې. کرزي هغه وخت روښانه کړې وه چې دغه پېسې د ولسمشریز دفتر د چارو د پرمخ بیولو له پاره کارول شوې وې.

DW.COM