1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

اروپا ته مهاجرت

په آلمان کی د کډوالو د شمیر محدودلو غوښتنه

د صدراعظمي انګلا میرکل، محافظه کاره متحدانو له هغې څخه غوښتي دي چې په آلمان کې د پناه غوښتونکو حد معلوم کړي. په همدې حال کې یوي آلماني ورځپاڼې وړاندوینه کړې چې سږ کال به ۱،۵ میلیونه کډوال آلمان ته راشي.

له آلمانۍ «دویچلند فونک رادیو» سره په مرکه کې د آلمان صدراعظمي انګلا میرکل، وویل چې سره له دې چې د کډوالو کړکیج لپاره د حل لاره موندل یو سخت کار دی خو آلمان دې ستونزې سره د مخامخ کیدو توان لري.

میرکل زیاته کړې ده چې د غوښتونلیک د منلو پروسه باید چټکه، او سرحدونه کنترول شي. صدراعظمې همدا راز وویل چی دا هم ډیره مهمه ده چی د کډوالۍ اصلي لاملونه په ګوته شي او دا چې کډوال د اروپایي ټولنې پر ټولو غړو هیوادونو په عادلانه توګه وویشل شي.

میرکل ویلي دي چې په پولو باندې د اغزي لرونکې سیمونو موانع جوړول بی معنی کار دی، ځکه چې کډوال بیا اروپا ته د راتګ بله لاره پیدا کوي. هغې همدا راز وویل: «زه فکر نه کوم چې اغزي لرونکي موانع کومه ګټه ولري، موږ په هنګري کې د دې شاهد وو.»

د کډوالو پر وړاندې د میرکل سیاست په آلمان کې بیلابیل غبرګونونه راپارولي دي.

د کډوالو پر وړاندې د میرکل سیاست په آلمان کې بیلابیل غبرګونونه راپارولي دي.

میرکل دا هم وویل چې د آلمان د پناه غوښتنې په قانون کې به کوم بدلون را نه شي او هیواد به یې د ۱۹۵۱ کال د ژنیو د کډوالو اساسنامه رعایتوي.

د «بېلد» په نامه آلمانۍ ورځپاڼې د خپل د دوشنبي ورځې په یوه رپوټ کې ویلي دي چې سږ کال آلمان ته د راتلونکو کډوالو شمیر تر یو نیم میلیون کسانو پورې رسیدای شي. د آلمان فدرال حکومت تر اوسه پورې په رسمي توگه په روان کال کې له ۸۰۰ زرو څخه تر یو میلیون مهاجرو د راتلو اټکل کاوه.

د بېلد ورځپاڼه زیاتوي چې د سږ کال په څلورمه ربع کې هره ورځ له پولې په غیر قانوني توگه له ۶۰۰۰ څخه تر ۱۰۰۰۰ کډوالو د اوښتو اټکل شوی دی.

شویبله: موږ دا نشو اداره کولی

د آلمان د مالیې وزیر ولفګنګ شویبله، د یکشنبې په ورځ له ZDF تلویزیون سره په مرکه کې وویل چې اروپا باید دې لویې وچې ته د راتلونکو کډوالو شمیر ته یو حد وټاکي. شویبله زیاته کړه: «موږ باید اروپا ته د راتلونکو کډوالو شمیر ته یو حد وټاکو او موږ نور نه شو کولی په عمومي ډول دا پروسه مدیریت کړو.» شویبله زیاته کړه: «اروپا به دا کار ډیر ژر وکړي او تر ټولو وړاندې به یي له ترکيي سره ترسره کړي.»

آلمانۍ «فرانکفورتر الګماین زونتاګ څایت» مجلې او د دی هیواد د ARD په نامه تلویزیونې شبکې د یکشنبې په ورځ راپور ورکړ چی اروپایي ټولنې او ترکیې سره موافقه کړې ده چې په ترکیې کې به د دوه میلیونه کډوالو لپاره شپږ نوي کمپونه جوړ کړي او د پولو د کنترول لپاره به ترکیه او یونان یو ځای کار پیل کړي.

لورینز کافییر چې د انګلا میرکل له ګوند څخه دی د یکشنبې په ورځ وویل چې د ۲۰۱۵ کال تر پاې پورې ښایي تر ۱،۵ میلیونه پورې کډوال آلمان ته راشي. هغه «ویلت ام زونتاګ» ورځپاڼې ته په ډاګه کړه چې ډیری فدرالي ایالتونه نور د کډوالو د منلو ګنجایش نه لري.

همدا راز د بایرن ایالت لومړي وزیر هورست زیهوفر، هم د کډوالو په برخه کې د خپل هیواد پر سیاست باندې نیوکه کوي او وایي چې میرکل په دې مورد که غلطه پالیسي خپله کړې ده.

د شنبي په ورځ په شیمنتز ښار کې شاوښوا ۱۰۰۰ تنه سره راټول شول او د هغه پلان پر ضد یي مظاهره وکړه چی له مخي يي په دې ښار کې یو پخوانی پوځي کمپ د کډوالو پر استوګنځای باندې بدلیږي.

د شنبي په ورځ د ګولتز په ښار کی هم ۱۰۰۰ تنه راټول شوي وو او د کډوالو پر ضد یی شعارونه ورکول چې «ګولتز خپل ځان پخپله ساتي». په همدې حال کی ۵۰۰ نورو کسانو بیا د کډوالو په ملاټر په همدی ښار کی مظاهره وکړه.

DW.COM