يوه افغان ښوونکي دوه تنه امريکايي سرتيري ووژل | افغانستان | DW | 01.03.2012
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

يوه افغان ښوونکي دوه تنه امريکايي سرتيري ووژل

افغان چاوراکو ویلي دي چې د پنجشنبې په ورځ د افغانستان په سویلي ولایت کندهار کې یو افغان ښوونکي د ناټو ځواکونو دوه تنه سرتیري وژلي دي.

د کندهار د ژړۍ ولسوالۍ ولسوال نیاز محمد سرحدي، ویلي دي چې یو افغان ښوونکي په دغه ولسوالۍ کې د ټوپک خوله پر امریکایي ځواکونو ور اړولې او دوه تنه امریکایي سرتیري ئې وژلي دي.

پيښه د ژړۍ ولسوالۍ د سنگيسار په سيمه کي تيره شپه د ملي اردو او نړيوالو ځواکونو په گډه قراگاه کي رامنځته سوې ده.

د ولسوال په خبره دغه ښوونکی وحيدالله نوميدئ او د وردگو ولايت د چک ولسوالۍ اوسېدونکی وو:

«دغه ښوونکي په دې قراگاه کي د کاردان مؤسسې له خوا د ملي اردو سرتيرو ته د سواد زده کړه ورکوله.»

ولسوال په خپلو خبرو کې زیاته کړې ده چې د امریکایي سرتیرو له خوا په ډزو کې بیرته دغه روزونکی او یو افغان سرتیری وژل شوی دئ.

د هغه په وینا دغه پیښه نن د پنجشنبې په ورځ «د ۲۰۱۲کال د مارچ د میاشتي لمړۍنیټه» په ژړۍ ولسوالۍ کې د ناټو په یو پوځي مرکز کې رامنځته شوې ده. خو د پیښي اصلي علت لا تر اوسه نه دئ معلوم.

په افغانستان کې د ناټو ځواکونو ویلي دي چې دوو تنو چې یو ئې د افغانستان د ملي اردو یونیفورم اغوستی وو د ایتلافي ځواکونو پر سرتیرو ئې ډزي کړي دي، چي په ترڅ کې ئې دوه تنه بهرني سرتیري وژل شوي دي. خو په دې اړه ئې د نورو جزئیاتو له ورکولو څخه ډډه کړې ده.

تیره اونۍ د بگرام په هوایي ډگر کې د یوه امریکایي سرتیري له خوا د قرآن د سوځولو تر پیښي وروسته تر اوسه ۶ تنه بهرني سرتیري د خپلو افغان همکارانو له خوا وژل شوي دي.

د آلمان خبري آژانس/ سید ریاض
کتونکی: نجیب الله زیارمل