1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

د افغانستان بيا رغاونه

ولسمشر غني د ترکمنستان-افغانستان د اوسپني پټلۍ پرانيزي

ولسمشر غني به د ترکمنستان-افغانستان ترمنځ د اسيا د اوسپني نړيوالي پلټۍ په پرانيست غونډه کي گډون وکړي. غني به دغه راز د ملگرو ملتونو په مشرتوب د «دوامداره ترانسپورتي سيستم» په نړيوال کنفرانس کي هم گډون وکړي.

د افغانستان د ولسمشرۍ ماڼۍ له خوا په خپره سوې اعلاميه کي راغلي دي چي ولسمشر غني د جمعې په ورځ ماښام ترکمنستان هیواد ته په درې ورځني سفر تللی دئ.

د ترکمنستان د بهرنيو چارو وزارت په حواله د شنبې او يکشنبې په ورځ (د نوامبر ۲۶ او ۲۷) په عشق آباد کي د ملگرو ملتونو د عمومي منشي بانکي مون په مشرتوب د «دوامداره ترانسپورتي سيستم» نړيوال کنفرانس رابلل سوی دئ.

د ياد وزارت د معلوماتو له مخي، د کنفرانس گډون کوونکي به د دوشنبې په ورځ د اتامراد-امام نظر- آقينې ترمنځ د اسيا د اوسپني نړيوالي پټلۍ په پرانيست غونډه کي هم گډون وکړي.

اتامراد – امام نظر – آقينه، لار د ترکمنستان– افغانستان– تاجيکستان ترمنځ د اورگاډي پټلۍ د غځولو پروژې يوه برخه ده.

د اتامرات– امام نظر– آقينه او اندخوی په نوم دغي ۱۲۰ کيلومتره اورگاډي پټلۍ پر غځولو باندي افغانستان او ترکمنستان د ۲۰۱۱م کال په می مياشت کي سره سلا سول.

پتېيل سوې ده چي په دغه دوه ورځني نړيوال کنفرانس کي به گډون کوونکي، د هيوادونو ترمنځ د يوه داسي ډاډمن ترانسپورتي کريدور د جوړولو ترحي وړاندي کړي، چي د وگړو او سوداگري موادو د تگ را تگ له پاره د اعتبار وړ وي.

په دې کنفرانس کي به پر عمومي او تخصصي غونډو سربيره، نړيوال تړونونه هم لاسليک او دوې اړخيزي او څو اړخيزي غونډي هم جوړي سي.

د دوامداره ترانسپورتي سيستم په دغه نړيوال کنفرانس کي د ملگرو ملتونو پر عمومي منشي بان کي مون سربيره د افغانستان جمهور رئيس محد اشرف غني، د پاکستان لومړی وزير نواز شريف او په لسونو نورو هیوادونو مشران او استازي گډون کوي.

نور مطالب:

DW.COM