1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

آلمان او نړۍ

وسلوالو په الغردقه کې پر هوټل بريد وکړ

بريدکوونکي سره سمندر ته پرتې د «بېلا ويستا» هوټل ساحې ته ورننوتل او غوښتل يې چې سيلانيان يرغمل کړي. مصري امنيتي ځواکونو مداخله وکړه او يو عامل يې وواژه. درې سيلانيان په دغه پېښه کې ژوبل شول.

د مصر په مشهور تفريح ځای الغردقه کې درې سيلانيان يعنې يو اتريشی او دوه سويډنيان د بريدکوونکو په چړو ژوبل شول، چې روغتيايي وضعيت يې د اندېښنې وړ نه دی. دغه خبر په قاهره کې د کورنیو چارو وزارت ورکړی دی. بريدکوونکو د څرګندونو له مخې هڅه کوله چې د يوه رستورانت د لارې د «بېلا ويستا» په نوم هوټل ته ورداخل شي.

عيني شاهدان کيسه کوي چې بريدکوونکي د سمندر له لوري ورنژدې شول، کله چې سيلانيانو د ماښام ډوډۍ خوړله. داسې هم ويل شوي دي چې يوه عامل يو مېلمه سمدلاسه يرغمل کړ. امنيتي ځواکونو بيا مداخله وکړه او يو بريدکوونکی يې په ډزو وواژه. دغه سړی د کورنيو چارو د وزارت په خبره يو ۲۱ کلن محصل و. دويم عامل سخت ټپي شو. پوليسو ورپسې هوټل خالي کړ او د چاودېدونکو توکو کارپوهانو ټوله ودانۍ وپلټله.

د آلمان د بهرنيو چارو وزارت وضعيت لا ناڅرګند په ګوته کوي

په برلين کې د بهرنيو چارو وزارت وويل چې په الغردقه کې وضعيت لا ناڅرګند برېښي. د وزارت يوه وياند وويل: «د ډاډ وړ معلومات لا نه لرو چې آيا د آلمان اتباع هم اغېزمن شوي دي، که نه.» په خپله انترنېټ پاڼه کې دغه وزارت داسې خبرداری ورکوي: «سيلانيانو ته مشوره ورکول کيږي چې په الغردقه کې دې پام وکړي، له سفرونو څخه دې اوسمهال ډډه وکړي او د دغې ويبپاڼې او مطبوعاتو له لارې دې ځانونه باخبره وساتي.» دا په داسې حال کې ده چې د آلمان سفارت په قاهره کې له ځايي چارواکو او د سفرونو له آلماني اژانسونو سره تماس نيولی دی.

الغردقه د سيلانيانو له پاره يو محبوب هدف دی

الغردقه د ژمي پر مهال د سيلانيانو د خوښې او لېوالتيا يو تفريح ځای دی. د مصر له پاره سيلانيتوب هم د عايد يوه مهمه منبع ده. خو سيلانيان له هغه وخت راهيسې کم شوي دي چې د اکتوبر په ۳۱مه يوه روسۍ سپرلۍ لېږدونکې الوتکه له چاودنې وروسته د سينا نيمه ټاپو د پاسه ولوېدله. ټولو ۲۲۴ سپرليو خپل ژوند له لاسه ورکړ. دغې الوتکې د مصر له شرم الشيخ څخه الوتنه کړې وه چې د جهاديانو د «اسلامي دولت» ډلې يې د بريد پړه پر غاړه اخيستې وه.