1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

آلمان او نړۍ

هر اتم آلمانۍ په غريبۍ کې ژوند کوی

په جرمني کښي هر اتم جرمنی غريب دی ، او ۱۳ فيصده نور د اجتماعي کومکو لکه د بيکارۍ ، کور او يا کوچنيانو دپاره د پيسو د ورکولو پواسطه د فقر څخه راګرځيدلي دي .

په آلمان کې يو گدايي گر

په آلمان کې يو گدايي گر

 په عين حال کښي د ښه عايد لرونکو کسانوعايدات نور هم ډیر سوي دي ، چه پدې ډول د ماړه او غريب تر منځ فاصله نوره هم ډيره سوې ده . دا د جرمني د حکومت د غربت او ثروت دريم رپوټ دی ، چه په حقيقت کښي يوازي د کار د مسودې په نامه وړاندي سوې ده . خو دهغه په اهميت د سوسيال دموکراټ د ګوند عمومي منشي هوبيرتوس هایل هم ښه پوهيږي .

«موږ بايد پوه سو چه په جرمني کښي د غربت نوی ډول موجود دی . دغه فقر او غربت نسبي دی ، چه زموږ د جامعې مطابق دی ، او هغه د وروسته پاته  يا مخ پر ودي هيوادو سره نه مقايسه کيږي . دا څو اړخيزه فقر دی ، چي د يوې خوا مادي فقر دی ،او د بلي خوا معنوي . دا پدې معنی چه هغو ته نور د زده کړي او تحصيل چانس او همدارنګه د کار پيداکيدو امکانات نه برابريږي . » 

د اروپايي ټولني د تعريف پر اساس غريب هغه څوک دی ، چه يو نفر چه يوازي ژوند کوي ، او د متوسط عايددر لودونکو کسانو څخه تر ۶۰  فيصده کم  عايد ولري ، يعني  ۷۸۱ ايرو خالص عايد ولري . ځکه نو سوسيال دموکراټ  ګوند د ژوند کولو دپاره د لږ تر لږه عايد سرحد تعينول غواړي . خو هغه دده اييتلافي ګوند مسيحي ديموکرات ردوي .

مسيحي ديموکرات  ګوندوايي چه د لږ تر لږه معاش تعينول ، د کار ځايونه له منځه وړي ،او د فقر په مقابل کي بايد یوازي د کار د ځايونو په پيداکولو سره مبارزه وسي . په عین حال کښي په مسيحي ديموکرات  ګوند کښي هغه ډله ډيريږي ، چه غواړي ماليات کم سي . ځکه چه د ډيرو مالياتو پواسطه  نه یوازي  لږ عايد لرونکو، بلکه متوسط عايد لرونکو هم تر فشار لاندي راځي . د جرمني د مصرف کونکو دچارو وزير هورست زې هوفر ډاډه دی ،چه په مالياتو کښي به آسانتياوي رامنځته سي :

« موږ په راتلونکي کال کښي د کوچنيانو پر موضوع خبري کوو . ځکه څوک چي کوچنيان لري ، بايد د ډيرو ماليو د ورکولو څخه خلاص سي . دوهم دهغو کسانو دپاره ماليات راکم کو چه موټرانو ته مجبوره دي ، او اوس تيل او بنزين ګران سوي دي ، او نسي کولای خپلو کارو ته په ښه ډول رسيدګي وکي . »

خو د سوسيال دموکراټانو ، زرغونيانو او چپيانو په عقيده بيا دا د غربت سره هيڅ کومک نه کوي ، ځکه چه غريبان خو هيڅ ماليه نه ورکوي ، او ځکه نو غواړي چه دولت د غريبانو سره نور کومک هم وکي .

زرغونيان غواړي چه د بيکارانو پيسې يو پر څلرمه برخه لوړي ، يعني ۴۲۰ ايرو ته په مياشت کښي لوړي سي . سربيره پر دې هغه کسان چه لږ عايدات  لري ، د اجتماعي کومک د يوې برخي د ورکولو څخه خلاص سي . چپيان بيا غواړي چه د سرمايه دارانو دپاره پر سرمايه باندي خاصه ماليه وضع سي . د نوي رپوټ پر اساس ثروتمند هغه څوک دی ، چه که يوازي ژوند کوي ۳۴۱۸ ايرو خالص عايد ولري ، او يا ددوو کوچنيانواو ماندينې سره د مياشتي تر ۷۱۷۸ ايرو اضافه خالص عايد ولري .

پر ۲۵ د جون بايد د جرمني په کابينه کښي د فقر او ثروت دنوي رپوټ په باب جر وبحث وسي ، او تر هغه وروسته به رسمآ نشر سي . خو ترهغه وخته پوري بايد وزيران او حکومتي اييتلاف خپل نظرونه ورکي .