1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

د افغانستان بيا رغاونه

هرات کي د مرمرو د پروسس بله فابريکه جوړه شوه

د دوستۍ په نامه ددغي فابريکې د جوړيدو مالې لګښت چي شپږ مليونه ډالره کيږي د امريکا د متحده ايالاتو د نړيوال پراختيايي بوديجي څخه ورکړل سوی دی. دا څلورمه فابريکه ده چي په دې برخه کي په کار پيل کوي.

د مرمرو څخه جوړ سوي شيان

د مرمرو څخه جوړ سوي شيان

په دې فابريکه کي به 600 کسانو ته د کار زمينه برابره سي. د چارواکو په خبره افغانستان به د کال 15 ميليونه امريکايي ډالره د مرمرو له درکه عوايد ترلاسه کړي، او هر کال به د ۲ ميليونه امريکايي ډالرو په ارزښت د مرمرو ډبري په غوره کيفيت د نړۍ معتبرو مارکيټونو ته واستوي.

د هرات په چشت شريف ولسوالۍ کي د مرمرو ډبري شتمن کان موجود دی. د دوستۍ فابريکي د پرانستي په مناسبتي غونډه کي د سل رنګه قيمتي ډبرو د پيژندګلوي په اړه هم خبري سوي.

په هرات کي د صنعتکارانو د ټولني ريس توريالي غوثي دويچه ويله ته وويل:« د هيواد ټول صنايع په ځانګړي ډول د مرمرو ډبري ښه کيفيت لري او د نړيوالي ټولني ملاتړ به يي نور هم پرمختګ ته لاره هواره کړې.»

د افغانستان د معدن اوصنايعو وزير وحيد الله شهراني په وينا د هيواد په کچه يې د کانونو د مسلکي سپړنو له پاره پلانونه ترلاس لاندي نيولي، چي د هرات د مرمرو په کان کي پر کيندني سربيره په نږدې راتلونکي کي د دغه ولايت په ادرسکن ولسوالۍ کي هم د ميسو د کان د سپړني په نيت به پانګه وال سيالي ته را وبولي.

د اړونده چارو کارپوهان وايي چي په هرات کي د سروزرو، ميسو، مرمرو او په تيلو سربيره د يو شمير نورو کانونو پيژندنه هم سوې ده. چي په استخراج سره به يې نه يوازي د دغه هيواد اقتصاد بډايه سي، بلکي ډيرو خلکو ته به د کار زمينه برابره سي.

ويل کيږي چي د هرات د مرمرو کان د 140 ميلياردو ډالرو په ارزښت مرمر لري، چي د کال 15 ميلونه ډالره عوايد يي د دولت خزادنې ته سپارل کيږي.

شريف شرفيار/ هرات

کتونکی: نجيب الله زيارمل