نگورنو قره باغ کې لا نښتې ادامه لري | آلمان او نړۍ | DW | 04.04.2016
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

آلمان او نړۍ

نگورنو قره باغ کې لا نښتې ادامه لري

په اصل کې آذربایجان د یوه اوربند له پاره غږ کړی وو، خو په نگورنو قره باغ کې نښتې ادامه لري. اوس په باکو کې مشرتابه د قفقاز په دغه سیمه کې د تهاجمي عملیاتو گواښ کړی دی.

د آذربایجان د دفاع وزارت ویاند په باکو کې ویلي دي: «که چیرې د آرمنستان لمسون ادامه ولري، نو موږ به د جبهې په اوږدو کې پراخ عملیات پیل کړو او د خپلو ټولو وسلو څخه به کار واخلو.»

خو مخالف اړخ د نگورنو قره باغ دفاع وزارت پر آذربایجان باندې تور لگوي چې په تیرو ورځو کې یې د توغندیو، هاوان او ټانکونو بریدونو ته زور ورکړی دی. د هغوی په خبره لږ تر لږه ۳۰ عسکر او ملکي کسان د شنبې او یکشنبې په ورځو وژل شوي دي.

د یکشنبې په شپه بیا هم مرگ ژوبله رامنځ ته شوې ده. په باکو کې د دفاع وزارت د درو عسکرو د وژل کیدو خبره کوي چې د آرمنستان له ځواکونو سره په نښتو کې وژل شوي دي. د آذربایجان گاونډي جمهوریت آرمنستان د نگورنو قره باغ په پلویتوب جنگيږي. ځکه دغه سیمه چې د آذربایجان په دننه کې پرته ده، زیاتره اوسیدونکي یې آرمنیان دي.

د آرمنستان د دفاع وزارت یوه ویاند ویلي دي د دغه هیواد پوځ په ډیرو ځایونو کې پرمختگ کړی او ځینې مواضع یې نیولي دي. خو باکو بیا دغه معلومات ردوي.

د شنبې او یکشنبې په ورځو نگورنو قره باغ کې خونړۍ نښتې وشوې

د شنبې او یکشنبې په ورځو نگورنو قره باغ کې خونړۍ نښتې وشوې

په ویانا کې د کړکیچ په هکله خبرې اترې

په ۱۹۹۰م لسیزه کې د یوې خونړۍ جگړې وروسته نگورنو قره باغ خپلواکه اعلان شوی وو. خو دغه څه په نړیواله توگه په رسمیت و نه پيژندل شو او باکو د سیمي د ملکیت د ادعا پر سر ټینگ پاتې شو. په ۱۹۹۴م کال کې د رامنځ ته شوي یو اړخیز اوربند، چې تل ترې سرغړونه کیږي په اصطلاح د نگورنو قره باغ شخړې ته د پای ټکی کینښود.

د اروپا د امنیت او همکارۍ سازمان (OSCE) په منځگړتوب د سولې خبرې اترې له کلونو راهیسې له ځنډ سره مخامخ دي. د سه شنبې د ورځې له پاره په ویانا کې یوه بیړنۍ غونډه په پام کې نیول شوې ده.