1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

آلمان او نړۍ

مېرکل او اوباما پر زياتو موضوعاتو همږغي ښودلې

انګېلا مېرکل او بارک اوباما پېوستون او يووالی ښودلی دی. دواړو مشرانو پر ټولو مهمو موضوعاتو او د نړيوالو ستونزو د حل او د خپلمنځي تجارت د زياتولو پر موضوعاتو همږغي ښودلې ده.

د آلمان صدراعظمې انګېلا مېرکل ويلي دي چي د مهاجرو د بحران د قابو کولو، د سوريې او اوکراين د لانجو د حل او د چاپيريال ساتنې پر موضوعاتو د ولسمشر اوباما سره همنظره ده.

نوموړې و آلمان ته د بارک اوباما د سفر په تړاو وويل چي دغه سفر «ستراتيژيک اهميت» لري. مېرکل زياته کړه چي د امريکا متحده ايالات د ۴۰ کالو وروسته يو ځل بيا د آلمان په تر ټولو لوی تجارتي شريک هيواد اوښتی دی. مېرکل وويل چي اوس وخت رارسېدلی چي د اتلانتک سمندر د دواړو اړخونو تر منځ شراکت بيا نوی کړل سي. مېرکل او اوباما دواړه د ټيټيپ په نوم د آزاد تجارت د تړون د لاسليک کېدو پلويتوب کوي.

ټيټيپ ناندريزه موضوع

په آلمان کې د ټيټيپ تړون يوه ناندريزه موضوع ده. د شنبې په ورځ (د ۲۰۱۶ کال د اپريل ۲۳مه نېټه) د آلمان په هانوور ښار کي په لسګونو زرو انسانانو د دغه تړون پر ضد مظاهره وکړه. مېرکل او اوباما ترمخه لا د تړون په پلويتوب خبرې کړې وې، چې د دوی په خبره د اتلانتيک يا اطلس سمندر دواړو غاړو ته يې په مرسته د روزګار نوي کارځايونه رامنځ ته کيږي. انتقاد کوونکي بيا استدلال کوي چې د متحدو آيالاتو د معيارونو راوستل د اروپا د معيارونو تر پښو لاندې کول دي.

د امريکا متحده آيالات په هانوور کي د سږ کال د صنعتي نندارتون مېلمه هېواد دی. دا لومړی ځل دی چې د متحدو آيالاتو يو ولسمشر د نړۍ د تر ټولو صنعتي نندارتون پرانيستنه تر سره کوي. ورپسې بيا د دواړو هېوادونو د اقتصاد له وتلو استازو سره د ماښام ډوډۍ په نظر کې نيول شوې ده.

وړه سرمشريزه

د دوشنبې ورځي د غرمې وروسته مېرکل يوې وړې سرمشريزې ته بلنه ورکړې ده چې د بريتانيې لومړی وزير ډيويډ کامرون، د فرانسې ولسمشر فرانسوا اولاند او د ايټاليې لومړی وزير ماتېو رېنزي به هم پکښي ګډون وکړي. په دغه سرمشريزه کې به هم ښايي د نړيوالو کړکېچونو، ترهګرۍ او د ټيټيپ د تړون په هکله خبرې وسي.

آلمان ته وروستی سفر؟

بارک اوباما د پنځم وار له پاره جرمني ته راغلي. دا به ښايي وروستی ځل وي چې اوباما د ولسمشر په توګه له آلمان څخه ليدنه کوي.

د باراک اوباما د ولسمشرۍ دوره د راتلونکي مېلادي کال ۲۰۱۷ په جنورۍ کي پای ته رسيږي. د روان کال د نوامبر په مياشته کي به په امريکا کي د ولسمشرۍ ټاکنې تر سره سي، چي د هغه څخه وروسته به اوباما په جنورۍ مياشت کي له خپلې دندې پر شا سي. اوباما دوه واري پرله پسې د امريکا د ولسمشر په توګه وټاکل سو. خو د امریکا د اساسي قانون له مخي يو ولسمشر صرف دوه ځله د ولسمشر په توګه ټاکل کېدلای سي.