1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

آلمان او نړۍ

مبارک لا تر اوسه ځان بې ګناه بولي

وروسته له درې میاشتو ځنډ څخه د مصر د راپرځول شوي واکمن، حسن مبارک، محاکمې ته دوام ورکړل شو.هغه باندې د اختلاس، اداري فساد او د مصر د ولسي انقلاب په ورځو کې د انسان وژونکو حملو تورونه لګول شوي دي.

د مبارک د محاکمې پر وخت د محکمې په وړاندې مبارزې روانې وي

د مبارک د محاکمې پر وخت د محکمې په وړاندې مبارزې روانې وي

دا ځل هم دغه پخوانی ټولواک ولسمشر د ناروغی په بستر کې محکمې ته راوړل شو. د محکمې ودانۍ ته نږدې د مبارک مخالفینو او پلویانو په احتجاج لاس پورې کړ. د هغه مخالفینو وایی چې دا محاکمه هسې یوه ډرامه ده. دوې زیاتوې چې د مبارک باند لا تر اوسه پورې د مصر په قدرت منګولې خښې کړي دي.

د هغوی په مقابل کې د مبارک پلویان هم راټول شوي ول ترڅو له هغه څخه خپل ملاتړ څرګند کړي. د محاکمی د امنیت د خوندي ساتنې لپاره ۵۰۰۰ پولیس ګمارل شوي ول. په تیرو محاکمو کې د مبارک د پلویانو او مخالفینو ترمنځ اخ و ډبونه رامنځ ته شوي ول.

دري اتیا کلن مبارک د مرګ له سزا سره مخامخ دی. هغه ته د مخالفینو لخوا د زماني د فرعون لقب ورکړل شوی. مبارک پر مصر دیرش کاله حکومت کړی دی او د مخالفینو لخوا یې په ډیرو سختو جرمونو تورن دی.

مبارک اوس له دې انکار کوي چې د ۲۰۱۱ کال په پیل کې د هغه د حکومت پولیسو بی ګناه احتجاج کونکي ټکولي او وژلي دي. د رپوټونو له مخې د مصر په پاڅونونو کې ۸۵۰ کسانو خپل ژوند له لاسه ورکړ.

د مبارک مدافع وکیل، یاسر عبدالرزاق، خپل مؤکل بې ګناه ګڼي. هغه وایي چې دا محاکمه یوه «توطئه» ده چې په کې د نورو ملامتیا پر دریم سړي اچول کیږي. هغه زیاتوي:

«د لبنان حزب الله، د فلسطین د القسام پوځي ډلګۍ، د سینا صحرا کوچیان، د مصر اخوان المسلین؛ دوی ټول په دې توطئه کې لاس لري. دغو ډلو د مظاهرو په ورځ د پولیسو نقلیه وسیلې پټې کړې او د خلکو په ټولنه باندې وختل. د دې لپاره ثبوت شته.»

هغو شاهدانو چې تر اوسه پورې محکمې ته خپل بیانونه ورکړي مبارک ته برائت ورکړی. د هغو په ډله کې د مصر د اوسني پوځي شورا مشر او د مصر اوسنۍ واکمن، محمد تنطاوی، هم شامل دی. هغه د محکمی په وړاندی وویل:

«مبارک پر مظاهره کونکو باندې د ډزو امر نه دی کړی.»


بل شاهد جنرال سمع حافظ عنان نومیږي چې په پوځي شورا کې دوهم زورواکی دی. د مبارک محاکمه د عامه حضور څخه پرته سرته رسول کیږي. که څه هم د محاکې څارونکو ته د ګډون اجازه شته خو هغوې ته د محاکمې د جزییات د بربندول په صورت کې سختې سزا ګواښ شوی دی.

د برلین د آزاد پوهنتون استاد او د مصر د چارو کارپوه، حمدی العوني، وایي چې په مصر کې لا تر اوسه هم آزاد قضایي سیستم شتون نه لري. هغه زیاتوي:

«ټول پوهیږي چې د دغې محکمې قاضیان د مبارک له خوا نومول شوي دي.»

په قاهره کې د آلمان د فرید ریښ نایمن د مرکز د دفتر د مشر، رونالد مایناردوس، په نظر په محاکمه کې د واکمنو پوځيانو لاس وهنه له ورایه ښکاري.

آژانسونه/ عبدالباري حکیم
کتونکی: مسعود جهش

DW.COM