1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

مارشال محمد قسیم فهیم په طبعي مرگ ومړ

د ولسمشر لومړی مرستیال مارشال محمد قسیم فهیم، د یکشنبې په ورځ په طبعی مرگ ومړ. دغه خبره د ولسمشر ویاند ایمل فیضي، په خپلې تویتر ټولنیزې پاڼې کې تایید کړې. له بلې خوا په افغانستان کې په څو اوونیو کې ټاکنې کیږي.

مارشال محمد قسیم فهیم، له ۲۰۰۹ کال راهیسې د افغانستان د ولسمشر لومړۍ مرستیال وو. هغه د افغانستان په کورنیو جگړو او د طالبانو پر ضد جنگ کې هم فعاله ونډه لرله. د افغانستان د ولسمشر ویاند ایمل فیضي په خپل تویتر پاڼې کې لیکلي دي: «مارشال محمد قسیم فهیم ومړ. خدای دې د هغه روح آرامه ولري.»

فهیم د ولسمشر تر مرستیالۍ مخکې د افغانستان د دفاع وزیر وو. هغه د احمد شاه مسعود، تر وژل کیدو وروسته د هغه د ځواکونو مشري پر غاړه واخیسته او تر ۲۰۰۱ کال راهیسې د ولسمشر حامد کرزي له سختو ملاتړو څخه شمیرل کیده.

په کابل کې د ستراتیژیکو مطالعاتو له مرکز څخه داود مرادیون، وایي چې د ولسمشریزو ټاکنو پر مهال مارشال فهیم کله له یوه او کله هم له بل نوماند سره ملاتړ کاوه. هغه وايي چې فهیم هم د ولسمشر کرزي له ورور او هم له عبدالله عبدالله سره اړیکې لرلې. که څه هم اوس د ولسمشر ورور قیوم کرزی، د زلمي رسول په گټه له خپلې نوماندي تیر شوی دی، خو عبدالله عبدالله اوس هم د ولسمشرۍ له پاره خپلو ټاکنیزو مبارزو ته دوام ورکوي.

په کابل کې د افغانستان څیړونکې کیت کلارک، وایي چې که څه هم فهیم ډیر په رسنیو کې نه څرگندیده خو هغه د تړلو دروازو تر شا په غونډو کې ډیر نفوذ لاره. هغه وایي: «له ۲۰۰۱ کال راهیسې کرزی، فهیم او امریکایان په افغانستان کې درې قوي ځواکونه پاتې شوي دي.» میرمن کلارک زیاتوي: «هغه د بریا په برخه کې د کلیدي وگړو له ډلې څخه وو ځکه هغه د افغانستان په یوه سیاسي – پوځي گوند کې ډیر نفوذ لاره.»

په افغانستان کې د اپریل پر پنځمه نیټه ولسمشریزې ټاکنې کیږي. که دغه ټاکنې د پلان له مخې پر مخ ولاړې شي نو دا به د افغانستان په تاریخ کې لومړۍ ځل وي چې د ټاکنو له لارې له یوه حکومت څخه بل ته واک لیږدول کیږي. ولسمشر کرزی د افغانستان د اساسي قانون پر اساس نه شي کولای چې په دغو ټاکنو کې خپل ځان ونوموي.

DW.COM