1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

لودين: له فساد سره د مبارزې بايد يوه اداره وي

له اداري فساد سره د مبارزې اداري مشر د ټولو هغو جوړښتونو د له منځه وړلو غوښتنه کړې ده چي وايي کار ئې له دوی سره توپير نه لري. په دغه برخه کي اته ادارې بېلابېلي ادارې فعاليت لري.

دمګړۍ په ملک کي دننه له اداري فساد سره د مبارزې له پاره شاوخواه اته بېلا بېلي ادارې جوړي سوي دي.

له اداري فساد سره د مبارزې د ځانګړي ادارې مشر عزيز الله لودين وايي که د دوی ادارې ته ورته موازي جوړښتونه له منځه ولاړ نه شي نه به دوی سم کار وکړای شي او نه به هم د هغوی هڅي ګټوري پايلي ولري.

لودين دغه غوښتنه په داسي حال کي له ولسمشرکرزي څخه کړې ده چي وايي تر اوسه لا هم د کابينې د ځينو هغو وزيرانو چي په ميليونونو ډالره اختلاس ئې کړی دئ د ده پر مېز پرتې دي.

اوس يوازي افغانان نه، بلکي بهرنيان هم د خپلو هغو ميلياردونو ډالرو د اختلاس په اړه انديښمن دي چي په تيرو څو کلونو کي ئې له افغانستان سره مرسته کړي دي.

لودين وايي له فساد سره د مبارزې له پاره د څو ادارو رامنځ ته کيدلو دغه بهير ګډوډ کړی دئ.

«زه نه پوهيږم، دلته ئې له فساد سره د مبارزې له پاره بهرنيان ګمارلي دي چا ته لس زره چا ته شل زره ډالره معاش ورکول کيږی، زه نه پوهيږم چي د هغوی کار څه شی دئ، زموږ سره دومره د فساد دوسيې پرتې دي چي که ئې زه تاسو ته نومونه واخلم نو اوښکي به مو توی شي، که چيرته له فساد سره د مبارزې په برخه کي نورې ادارې و نه تړل سي زموږ کار به نتيجه و نه لري.»

په داسي حال کي چي د اداري فساد سره د مبارزي اداري مشر له ولسمشره څخه د موازي جوړښتونو د له منځه وړلو غوښتنه کوي، خلک بيا له دغي ادارې څخه غواړي چي د هغو مفسدو کسانو نومونه روښانه کړي چي د حکومت پر ګدۍ ناست دي.

د ولسي جرګې غړی محمد عبدو وايي که مفسد چارواکي محکمو ته ور وپېژندل شي او ورته سخته سزا ورکړل شي د حکومت نور مامورين به فساد ته زړه ښه نه کړي.

«يو فاسد کس چي له سره تر پايه په فساد ککړ وي، هغه حکومت له فساد سره د مبارزې په اداره کي وګماري، هغه په خپله پوهيږي چي هره بد بختي چي وکړي څوک نسته چي څه ورته ووايي».

اداري فساد اوس د افغانستان حيثيت ته سخت تاوان رسولی دئ او دغه هيواد اوس په نړيواله کچه د فاسدو هيوادونو په کتار کي ترصوماليا وروسته دوهم ځای لري.

ميرويس جلالزی/ کابل
کتونکی: نجيب الله زيارمل