1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

آلمان او نړۍ

لندن کې مسجد ته څیرمې یوې پیښې لږ تر لږه یو کس وژلی

د لندن په شمال کې یو موټر لاررویان لاندي کړي او لږ تر لږه یو کس یې وژلی دی. د پیښي په تړاو یو کس نیول شوی دی او په سیمه کې هم اضافي پولیس ځای پر ځای کړل شوي.

پیښه تیره شپه ناوخته رامنځ ته شوه. د پیښې په ځای کې د یوه کس وژل کیدل هم تایید شوي دي. پولیسو ویلي دي چې د دغه برید په تړاو یو ۴۸ کلن کس نیول شوی دی.

د پولیسو په بیانیه کې راغلي دي: «موټر چلوونکی د خلکو له خوا نیول شوی وو او بیا پولیسو ونیو کړ.»

د امبولانس مسوولینو ویلي دي چې د پیښې له سیمې څخه اووه کسان روغتون ته لیږدول شوي دي.

د انګلستان لومړۍ وزیر تریسا مي، ویلي دي: «پولیسو تایید کړې ده چې له دې پیښې سره د یوه احتمالي ترهګریز برید په توګه چلن کیږي.»

مې زیاته کړې ده: «زه د قربانیانو، د کورنیو او په سیمه کې د بیړنیو خدمتونو ډلې په فکر کې یم.»

د انګلستان د کورنیو چارو وزیرې امبر رود، تایید کړه چې دغه پیښه اوس د ترهګرۍ ضد قوماندې مرکز له خوا څیړل کیږي.

د پولیسو په حواله هغو ته د شپې پر ۱۲:۲۰ د لندن په «سیون سیستر واټ» باندې د یوې پیښې په اړه خبر ورکړل شو. عیني شاهدانو ویلي دي چې موټر چلوونکي په قصدي توګه پر هغو کسانو چې د روژې تر مراسمو وروسته له مسجد څخه د وتلو په حال کې وو، موټر ورځغلولی دی.