1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

قیوم کرزی: په هيواد کي د سولي لار جرګې دي

د ولسمشر حامد کرزي مشر ورور، قيوم کرزى، وايي ترهغو پوري به په هيواد کي د سولي خوند نه وي چي پښتانه په خپل منځ کي سره را ټول نه سي، مشرتابه معلومه نه کړي او یو ځل بیا جرګې ومرکې راژوندۍ نه کړي

آرشیف انڅور

آرشیف انڅور

قیوم کرزی وايي، چي د جرګو له لارې کیدای سي چې د سولي پروسې سره هم مرسته وسي. او د حکومت مخالفینو څخه وپوښتل سي، چي ولي دغه جګړه ترسره کوي او خپل ورونه وژني؟:

«تر هغو چې پښتانه په خپل عنعنوي شکل خپل مشرتابه معلوم نه کړي او سره راټول نه سي او د خپل ورور سره چي پر ماشه باندي يې لاس دى، دا و نه پښتي چې ټک پر څه کوي اوهدف دي څه دى؟ ترهغو پوري د سولي راتګ ستونزمن دی.»

قيوم کرزي دغه خبري د کندهار ولايت په ليري پرته ولسوالۍ، خاک ريز، کي د ولسي خلګو يوې لويي غونډي ته وکړي.

په دغه غونډه کي د سولي د عالي شورا د دارلانشا مسؤل، معصوم ستانکزي، هم راغونډو سويو خلکو ته په خپلو خبرو کي تاريخ ته په اشارې سره وويل:

«د تاريخ په اوږدو کي ثابته سوې ده، چي د جګړې ډګر افغانانو په سرو وينو ګټلى لاکن کوم وخت چي د روغي جوړي سمون او خبرو وار راغلى نو بيا يي دا ستره ګټه له لاسه ورکړې ده او د جګړو ترخې تجربې ته يې بيا مخه کړې ده چي دا دى تر اوسه پوري هيواد او هيوادوال په سرولمبوکي کړيږي.»

ستانکزي پر کندهاريانو په ځانګړي ډول د خاکريز ولسوالۍ پر خلکو ږغ وکړ چي له دې طلايي چانس څخه ډېره ګټه پورته کړي او نړيوالو ته وښيې چې افغانان نه يوازي د جګړې بلکي د سولي اتلان هم دي.

«متاْسفانه د تاريخ په طول کي افغانانو په توره ګټلې ده خو کله چي د خبرو، مذاکرې او بحث خبره راغلې ده دوى د هغه څخه ګټه نه ده ترلاسه کړې. بايد موږ هغه ترخه تجربه سره تکرار نه کړو. دغه د سولي هلي ځلي چي په لاره اچول سوي دي د دې معنی دا ده چي دا غوټه د غاښ پرځاى په لاس خلاصه کړو.»

په سهيلي حوزه کي د ميشتو نظامي ځواکونو د همږغۍ مسؤل، اسدالله خالد، د سولي را پيل سوى بهير د ټولو هيوادوالو په ګټه ياد کړ او زياته يې کړه چې د دې بهير موخه دا ده چي په هيواد کي د سولي فضا رامنځ ته شی او ټول هيوادوال له يو او بل سره څنګ ترڅنګ په خوښۍ خپل ژوند مخته روان کړي.

د سولي د عالي شورا د دارالانشا مسؤل، معصوم ستانکزي، د خپلو خبرو په ترڅ کي وویل چي که افغانان يو او بل سره پخلا او د سولي په فضا کي ژوند وکړي، نو هيڅ باندني ته اړتيا نسته چي دلته د مېلمه يا همکار په نامه پاته سي ځکه افغانان به خپلي ستونزي خپله حلوي.

دا لومړى ځل دى چي د سولي دعالي شورا غړي او نور لوړپوړي چارواکي له کندهار ښار څخه نژدې 70 کېلومټره ليري د خاکريزولسوالۍ ته سفر کوي اوهلته له ولسي خلکو څخه هيله کوي چي د ټول هيواد په کچه د سولي د راپيل سوي بهير ملاتړ وکړي او له دې لاري د هيواد خدمت کولو ته لستوڼي راپورته کړي.

دویچه ویله/ ابراهیم سپیڅلی
کتونکی: مسعود جهش

DW.COM