1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

غني د خپل حريف عبدالله تورونه رد کړل

د افغانستان ولسمشرۍ ته کانديد اشرف غني احمدزي د خپل حريف عبدالله عبدالله هغه تورونه چي وايي په ټاکنو کي درغلۍ سوي دي رد کړل. غني ويلي دي چي له يوې يوې رايي څخه به دفاع وکړي.

ولسمشرۍ ته کانديد ډاکټر اشرف غني احمد زي د چهارشنبې په ورځ (۲۰۱۴م کال د جون ۲۵مه) په کابل کي يوې خبري غونډه ته وويل: «زموږ رايي پاکي دي، ولس پر موږ باور کړی دی، موږ به اوس له خپلي هري رايي څخه دفاع وکړو.»

د افغانستان د ولسمشرۍ د دوهم پړاو ټاکنو پايلي لا تراوسه پوري روښانه نه دي، خو د رسنيو د راپورونو له مخي داسي ښکاري چي غني دي تر خپل حريف پکښي مخکښ وي.

د غني سيال عبدالله په ډېره علاقمندي سره د دوهم پړاو ټاکنو ته ولاړ، ځکه هغه په لومړي پړاو ټاکنو کي تر غني ۱۳ سلنه ډيري رايي په لاس راوړي وې. خو هغه مطلق اکثريت نوو پوره کړی.

د دوهم پړاو ټاکنو تر ترسره کېدو وروسته عبدالله پر خپل حريف غني، د ټاکنو پر خپلواک کمېسيون او تلونکي ولسمشر حامد کرزي باندي د درغليو تورونه ولگول.

خو دغه تورونه د ټولو اړخونو له خوا رد سول او تيره ورځ ډاکټر اشرف غني احمدزي هم چي تازه له سفر څخه راغلی وو دغه تورونه رد کړل.

غني تر هيواد دباندي د غاښونو تر درملني وروسته کابل ته په رسېدو سره په ټاکنو کي د درغليو په اړه د عبدالله د تورونو په غبرگون کي پر خپل سيال باندي ږغ وکړ چي د رايو شمېرني په پروسه کي گډون وکړي او پرېږدي چي د واک انتقال بې له جنگه ممکن سي.

هغه په خپلو خبرو کي دې ته اشاره وکړه چي مخکي تر دې چي د ټاکنو بهير مختم سوی وي، له هغه سره د اړيکو قطع کول د ماتي معنی لري.

ښاغلي اشرف غني وويل: «زما پوښتنه د اصلاحاتو او همگرايي له ټيم څخه دا ده چي خپل شکايتونه ولي د ټاکنيزو شکايتونو کمېسيون ته نه سپاري.» هغه وويل چي عبدالله باید د ټاکنو کمېسيون د رسمي پايلو تر اعلانه پوري صبر وکړي.

غني د ټاکنو پر کمېسيون ږغ وکړ چي له مهال وېش سره سم د ټاکنو پايلي اعلان کړي.

د پلان له مخي به د جولا مياشتي پر دوهمه نېټه د ټاکنو کمېسیون له خوا لومړۍ پايلي اعلان سي او د دغي مياشتي پر ۲۲مه نېټه به بيا وروستۍ پايلي اعلانيږي.