1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

غزني: ځانمرگی برید کوونکی تر برید مخکې ونیول شو

په غزني کې د جمعې په ورځ د ملي امنیت کارکوونکو یو تن پاکستانی ځانمرگی برید کوونکی نیولی دﺉ. د دې ولایت چارواکي وایي چې نیول شوی وګړی «متین اکبر» نومیږي چې غوښتل ئې د غزني ولایت پر تأسیساتو باندې برید وکړي.

د غزني د والي مرستیال محمد علي احمدي، د جمعې په ورځ په یوه خبري کنفرانس کې وویل چې د دې ولایت د امنیت کارکوونکو د دغه وگړي په اړه مخکیني معلومات لرل او هغه ئې خپل هدف ته تر رسیدو مخکې ونیوه.

د احمدي په خبره د غزني د اندړ د ولسوالۍ د پاڅون عمومي مشر فیضان الله فیضان، د ځانمرگي برید کوونکي د ډزو له کبله ټپي شوی دئ.

له ځانمرگي برید کوونکي څخه ځانمرگی واسکټ او نورې وسلې نیولې شوې دي.

له ځانمرگي برید کوونکي څخه ځانمرگی واسکټ او نورې وسلې نیولې شوې دي.

په همدې حال کې د غزني ولایت د ملي امنیت رئیس سید امیر شاه سادات، وویل چې دوه تنه نور وگړي چې د غزني اوسیدونکي دي او له ځانمرگي برید کوونکي سره ئې مرسته کوله هم د هغوی له خوا نیول شوي دي.

د سادات په خبره نیول شوی ځانمرگی برید کوونکی د پیښور اوسیدونکی دئ او د ننگرهار ولایت له لارې ئې خپل ځان غزني ته رسولی دئ.

د غزني ولایت د پاڅون کوونکو ادارې ویلي دي چې دغه وگړي غوښتل چې پر دې ادارې باندې برید وکړي خو د هغوی په خبره خپل هدف ته تر رسیدو مخکې د افغان امنیتي ځواکونو له خوا ونیول شو.

له بلې خوا د غزني ولایت د امنیت امر محمد حسین، د افغان او بهرنیو ځواکونو په گډو عملیاتو کې د قره باغ په ولسوالۍ کې د اتو تنو طالبانو او اندړ په ولسوالۍ کې د دوو تنو طالبانو د وژل کیدو خبر ورکړی دئ. د هغه په خبره وژل شوي کسان د ملا ذاکر په ډله کې شامل ول.

هغه همداراز ویلي دي چې افغان ځواکونو اوس د اجرستان په ولسوالۍ کې په مستقل ډول پوځي عملیات پیل کړي دي چې د هغه په خبره په ترڅ کې ئې څلور تنه طالبان او يو شمیر مهمات نیول شوي دي.

د غزني ولایت چارواکي وايي چې په وروستیو کې ئې طالبان ځپلي دي او له بهرنیو څخه په بشپړه توگه د دې ولایت د امنیتي مسئولیتونو تسلیمدو ته چمتو دي.

دویچه ویله/ مسعود جهش
کتونکی: سید ریاض