1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

سيمه

عربستان د ۱۰۰ ميليارده ډالرو په لکښت نوی ښار جوړوي

سعودي عربستان تر ۲۰۳۵م کاله پوري داسي ښار جوړوي چي دوه ميليونه انسانان به ژوند پکښې کوي او معماري به ئې يو شاهکار وي. په پام کي ده چي دغه نوی ښار به سره سمندر ته نزدې جوړ سي.

دغه ښار چي د «ملک عبدالله اقتصادي ښار» نوميږي په پلان کي ده چي د سعودي عربستان د اقتصادي مرکز جدې په شمال سل کيلومترۍ کي، سره درياب ته نژدې جوړ سي.

سره سمندر ته نزدې د دغه ښار د جوړولو هدف د سوداگريزو مالونو د انتقال اسانتيا ښوول سوې ده. د دغه ښار د جوړونکو په وينا دغه ښار به ډېر ژر په يو ستر سيمه ييز او نړيوال بازار بدل سي.

د دغه ښار بندر ته به له کاله ۲ ميليونه او ۷۰۰زره کانتينره رسيږي چي يوه ورځ به د نړۍ يو له لسو سترو بندرونو څخه وي.

د دغه ښار د جوړولو شرکت مشر فهد الرشيد ويلي دي چي په دغه ښار کي به صنعتي پارکونه، روغتونونه، ښوونځي او د لوبو ميدانونه جوړ سي.

دغه شرکت چي د ملک عبدالله اقتصادي ښار جوړوي په دبی کي ئې د نړۍ تر ټولو هسکه ودانۍ «خليفه برج» هم جوړه کړې ده.

ويل کيږي چي دغه پروژه د هغه پلان يوه برخه ده چي په سعودي عربستان کي د نفتو زېرو تر ختمېدو وروسته خلکو ته د کار زمينه برابره کړي.