1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

طالبان وايي په کندز کي ئې ۲۰۰ بستريز روغتون نيولی

طالبان وايي چي د کندز ښار ۲۰۰ بستريز روغتون ئې نيولی دئ. يوه افغان امنيتي چارواکي چي نه ئې غوښتل نوم ئې خپور سي دغه خبر تائيد کړی دئ. خو په دې اړه تر اوسه پوري نور جزئيات نه دي ورکړل سوي. پر کندز نن سهار يرغل پيل سوی.

د وسله والو طالبانو وياند ذبيح الله مجاهد د تويتر له لاري په يوه لنډ پيغام کي ليکلي دي چي د کندز ښار په جنوب ور ننوتل او هلته ئې يو روغتون نيولی دئ.

د کندز ولايت د ولايتي شورا غړي غلام رباني رباني د آلمان خبري آژانس ته ويلي دي چي د ولايتي شورا ودانۍ طالبانو نیولی او اوس هلته سخت جنگ روان دئ. هغه ويلي دي چي طالبانو نور دولتي تاسيسات او د پوليسو پوستې نيولي دي.

د هغه په خبره طالبان اوس د کندز د پوهتون پر لور د پرمختگ په حال کي دي.

تر دې دمخه د کندز د پوليسو يوه وياند سيد سرور حسيني، رويترز خبري آژانس ته ويلي ول چي نن سهار پر ۶ بجې وسله والو طالبانو پر کندز ښار باندي له درو اړخونو يرغل وکړ: «په دغه يرغل کي درنې وسلې هم کارول سوي چي ږغونه ئې په ښار کي اورېدل کېدل.»

حسيني ويلي دي چي همدا اوس په خان آباد، چهاردره او امام صاحب ولسواليو کي سخته جگړه روانه ده. د دغو درو ولسواليو لاري پر کندز ښار باندي راخلاصي دي.

هغه ويلي دي: «موږ په کافي اندازه امنيتي ځواک لرو او ډېر ژر به ياغيان پر شا کړو.»

حسيني ويلي دي چي په دغه جگړه کي تر اوسه پوري ۲۰ ياغيان وژل سوي دي او امنيتي ځواک ته تر اوسه زيان رسېدلی نه دئ.

له بلي خوا بيا د وسله والو طالبانو د تويتر اکونت له خوا په يوه لنډ پيغام کي د يرغل مسئوليت منل سوی او د کندز اوسېدونکو ته ئې ويلي دي چي له کورونو څخه دي نه راوځي.

دا دوهم وار دئ چي وسله وال طالبان پر کندز ښار باندي له څو اړخونو يرغل کوي. د روان کال په اپريل مياشت کي هم دغه شان يوه هڅه وسوه خو بيرته ژر پر شا وتمبول سول.

DW.COM