1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

طالبانو په هلمند کې ۱۲ افغان ځواکونه وژلي

په هلمند ولایت کې یوه افغان پولیس ویلي دي چې ۱۲ سرتیري یې د طالبانو په یوه برید کې وژل شوي دي. د دغه چارواکي په خبره طالبانو د هغه پر پوستې باندې برید کړی دی.

د لشکرګاه د پولیسو د دویمې حوزې قومندان حاجي ګران، د سه شنبې په ورځ وویل چې طالبانو د دوشنبې په ورځ ناوخته د پولیسو پر څلورو پوستو باندې بریدونه وکړل چې په پایله کې یې ۱۲ کسان ووژل شول او ۱۱ تنه نور ټپیان شول.

لشکرګاه له میاشتو راهیسې د طالبانو له خوا د نیول کیدو له ګواښ سره مخامخ دی. دغه ډله د روان کال له پیل راهیسې د هلمند ولایت د مرکز په لور د نزدې کیدو په حال کې ده.

د هلمند ولایت ویاند عمر ځواک، ویلي دي چې د دې ولایت خانشین ولسوالۍ د دوشنبې په ورځ د طالبانو لاس ته لویدلې ده.

د ځواک په خبره په وروستیو ورځو کې د افغان امنیتي ځواکونو شاوخوا ۴۵ غړي په جګړه کې وژل شوي او تر ۱۵ ډیر نور بیا د طالبانو له خوا نیول شوي دي.

طالبانو د دوشنبې په ورځ د یوې لنډې مودې له پاره د دویم ځل له پاره د کندز ښار مرکز ته ځان ورسوه خو وروسته بیا د ځانګړو افغان ځواکونو له خوا پر شا وتنبول شول.