1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

طالبانو په دوو ولایتونو کې له سلو ډیر کسان برمته کړي

طالبانو په تیرو څو ورځو کې د افغانستان په دوو ولایتونو کې له ۱۰۰ څخه ډیر مسافر برمته کړي دي. تر دې مخکې هم دغې ډلې د افغانستان له لویو لارو څخه مسافر برمته کړي او د هغوی له ډلې څخه یې یو شمیر وژلي وو.

چارواکو د پنجشنبې په ورځ وویل چې طالبانو په تیرو درو ورځو کې د بدخشان ولایت څخه د ۸۰ او ۹۰ تر منځ ځایي ملکي وګړي برمته کړي دي.

د بدخشان د ولایتي شورا غړي مجیب الرحمان، ویلي دي: «طالبان غواړي چې دولت په راغستان ولسوالۍ کې د هغوی تر کنترول لاندې د طلاو یوه کان ته د نفت د رسیدو مخه و نه نیسي.»

دغه سیمه ییز چارواکي زیاته کړې ده چې برمته شوي کسان ټول له همدې ولایت د درواز ولسوالۍ اوسیدونکي وو. د ولایتي شورا د دغه غړي په خبره اوس ځایي مشران هڅه کوي چې دغه کسان آزاد شي، خو لا تر اوسه پورې حکومت په کومې هڅې لاس نه دی پورې کړی.

د بدخشان د پولیسو یوه چارواکي سخي داد حیدري، ویلي دي چې لا تر اوسه پورې د برمته نیونې لامل روښانه نه دی او دا چې حکومت د برمته شویو کسانو د آزادولو له پاره هڅې پیل کړې دي.

په یوې بلې پیښې کې د چهارشنبې په ورځ نا پیژندل شوي وسلوالو له وردک ولایت څخه د بامیانو ۲۵ تنه اوسیدونکي برمته کړي دي. د وردګو د ولایتي شورا یوه غړي د پنجشنبې په ورځ وویل: «دغه کسان د جلریز له ولسوالۍ څخه برمته شوي دي. لا تر اوسه پورې د هغوې د برمته نیونې لامل روښانه نه دی.»

د جلریز ولسوالۍ یوه ځایي چارواکي د باختر خبري آژانس ته ویلي دي چې طالبان د دې پیښې تر شا دي.