شمالي کوریا جنوبي کوريا ته یو هیئت لیږلی دی | آلمان او نړۍ | DW | 04.10.2014
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

آلمان او نړۍ

شمالي کوریا جنوبي کوريا ته یو هیئت لیږلی دی

شمالي کوریا د آسیايي لوبو د پای ته د رسیدو د محفل څخه د خپل جنوبي گاونډي سره د خبرو اترو له پاره استفاده کړې. دغه سفر دواړو خواو ته هیلې راټوکولې دي.

جنوبي او شمالي کوریا په رسمي توگه تر اوسه د یو بل پر ضد د جنگ په حالت کې قرار لري. د کوریا د جگړې تر ختمیدو وروسته چې ۱۹۵۰ تر ۱۹۵۳ کال پورې یې دوام وکړ، د سولې کوم تړون لاسلیک شوی نه دی. د هغه راهیسې د دواړو هیوادونو تر منځ ترنگلتياوې وجود لري.

دغه ترنگلتیاوې هغه وخت ډیرې شوې کله چې په دې وروستیو کې د شمالي کوریا کمونسټي هیواد راکټي آزموینې زیاتې کړې. له همدې امله یو بل ته د نژدې کیدو دا گام حیران کونکی دی.

د رسمي معلوماتو پر حواله شمالي کوریا همدا د جمعې په ورځ (۲۰۱۴م کال د اکتوبر ۳ مه) د جنوبي کوریا مشرتابه ته په دې هکله خبر ورکړ چې د دې هیواد یو پلاوی به د آسیايي لوبو د پای په محفل کې د گډون په موخه انچیون ته سفر وکړي. په دغه هیئت کې د شمالي کوریا د نورو لوړ پوړو چارواکو سربیره حوانگ پیونگ سو هم شامل دی. نوموړی د شمالي کوریا د پوځ د سیاسي دفتر مشر دی او د جنوبي کوریا لخوا ورته په غیر رسمي توگه د کم یونگ اون وروسته د دویم واکمن په سترگه کتل کیږي.

د پیونگ یانگ لخوا مهم سگنال

د شنبې په ورځ انچیون ته تر رسیدو وروسته دغه هیئت ته د جنوبي کوریا د دفاع وزیر ریو کیهل یای لخوا هرکلې وویل شو. د ریو کیهل یای او د جنوبي کوریا د ملي امنیت د سلاکار کم خوان ین سره خبرې اترې په نظر کې نیول شوي دي. دا چې دغه پلاوی به د جنوبي کوریا د ولسمشر پارک گوین هويي سره هم وگوري، لا څرگنده نه ده.

دا سفر د پيونگ یانگ د رژیم د هغه نیت یو علامت گڼل کیږي چې د جنوبي کوریا سره یې د ترنگلو اړیکو د ښه والي له پاره لري. دغه پلاوی په داسې حال شمالي کوریا ته سفر کوي چې د شمالي کوریا واکمن کم یونگ اون د یو څو اوونیو راهیسې نه دی را څرگند شوی. شمالي کوریا منلې وه چې د دولت دغه مشر روغتیايي ستونزې لري.