1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

آلمان او نړۍ

شمالي کوريا بيا هم توغندي ازمويلي

د جنوبي کوريا د دفاع وزارت د راپور له مخي، د دغه هيواد گاونډي شمالي کوريا يووار بيا توغندي ازمويلي. دغه به بالستيک توغندي وې چي کولای سي جنگي کښتې هدف وگرځوي.

د شمالي کوريا د توغنديو د آزموینو پر ضد د ملگرو ملتونو د امنيت شورا قطعنامې هم ظاهراً د دغه هيواد د مشرانو پر پريکړو باندي اغېزه نه کوي. د جنوبي کوريا د دفاع وزارت د راپور له مخي، پيونگ يانگ بيا هم توغندي آزمويلي دي.

احتمالاً به دغه توغندی کروز ډوله وې، چي د جنگي کښتۍ د هدف له پاره طراحي سوي دي. دغه توغندی د شمالي کوريا له ساحلي ښار ونسان څخه توغول سوي او ۲۰۰ کيلومتره واټن ئې وهلی دئ.

د تيري جمعې په ورځ د ملگرو ملتونو امنيت شورا پر شمالي کوريا باندي نور بنديزونه هم تصويب کړل.

خو پر دې قطعنامې سربيره شمالي کوريا اعلان کړی دئ چي د توغنديو پروگرام به ئې مخ پر وړاندي روان وي. امريکا متحدو ايالاتو گواښ کړی دئ، چي که شمالي کوريا خپلو کړنو ته بدلون ور نه کړي، نو ددغه هيواد پرضد به پوځي اقدام وکړي. د تيري سه شنبې په ورځ د امريکا يو اټومي اوبتل د شمالي کوريا بوسان بندر ته ورسېد.

شمالي کوريا له ۲۰۰۶م کال راهيسي پنځه واري اټومي ازمويني کړي چي وروستی ئې تيرکال وه. پيونگ يانگ دغه راز د ليري واټن ويشتونکي توغندی د پراختيا په لټه کي دی چي وکولای سي اټومي خولۍ له ځان سره انتقال او امريکا متحد ايالات په نخښه کړلای سي.

DW.COM