1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

آلمان او نړۍ

سيپراس دوهم وار د يونان لومړی وزير سو

په يونان کي تر انتخاباتو يوه ورځ وروسته الکسيس سيپراس د دغه هيواد د لومړي وزير په توگه لوړه وکړه. سيپراس چي د سيريزا گوند مشر دئ، پتېيلې ئې ده چي يووار بيا له ښی اړخي گوند «خپلواکو يونايانو» سره ائتلافي حکومت جوړ کړي.

الکسيس سيپراس د دوشنبې په ماښام په هغو مراسمو کي چي د تلويزيون له لاري په ژوندۍ بڼه خپرېدل د يونان د جمهور رئيس په مخکي دوهم وار د لومړي وزير په توگه د دغه هيواد په اساسي قانون لوړه وکړه.

سيپراس چي د چپي گوند سيريزا مشر دئ د يکشنبې په ورځ په پارلماني ټاکنو کي ډېر رايي گټلي د يونان د مجهور رئيس له خوا د نوي دولت جوړولو سپارښتنه ورته سوې ده.

اوس سيپراس پتېيلې ده چي د سه شنبې ورځي په اوږدو کي د نوي کابينې ترکيب مشخص کړي. د هغه گوند په ټاکنو کي ۳۵،۵ سلنه رايي وگټلې.

سيزيرا گوند په دغو رايو سره په پارلمان کي له ۳۰۰ چوکيو څخه ۱۴۵ خپلي کړي دي. د يوه بشپړ اکثريت له پاره ۱۵۱ چوکۍ بايد په پارلمان کي ولري.

اوس بايد د سيزيرا د گوند مشران يووار بيا له ښی اړخي گوند «خپلواک يونانيان» سره ائتلافي حکومت جوړ کړي. دغه ائتلاف به د يونان په پارلمان کي ۱۵۵ چوکۍ ولري. د کيڼ اړخو او ښی اړخو ائتلاف تر دې دمخه ۷ مياشتي پر يونان حکومت وکړ.

په پام کي ده چي د يونان د نوي پارلمان لومړۍ غونډه به د اکتوبر مياشتي پر لومړۍ نېټه د پنجشنبې په ورځ وي.

DW.COM