1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

آلمان او نړۍ

سعودي ته د اوباما سفر د سبتمبر د یوولسمې نیټې بریدونو تر سیوري لاندې

د امریکا متحده ایالاتو ولسمشر بارک اوباما، د سه شنبې په ورځ په داسې حال کې سعودي عربستان ته سفر کوي چې په پارلمان کې د هغې مسودې په سر لانجه ده چې له مخې یې د ۱۱ سبتمبر د پیښو پړه پر سعودي عربستان ور اچول کیدای شي.

د سعودي حکومت ګواښ کړې چې که دغه مسوده تصویب شي نو خپلې امریکايي شتمنې خرڅې کړي.

اوباما د خپل سفر د مخه د «سي بي ایس نیوز» شبکې سره د خبرو پر وخت وویل چې د دغه مسودې سره چې ښایي له مخې د سعودي شاهي حکومت د امریکا په محکمو کې د ۲۰۰۱ م کال د ستمبر د ۱۱ پر پیښو تورن شي، مخالفت لري.

د « ترهګرۍ د تمویلونکو ضد عدالت» قانون، د ذکریا موسوي چې د سپتمبر د یوولسمې نیټې بریدونو پر مهال شلم یرغمل نیوونکي بلل شوی، د هغو ادعاو وروسته وړاندې شو چې په ۱۹۹۰م کلونو کې د سعودي عربستان د شاهي کورنۍ غړو القاعدې شبکې ته په ملیونو ډالر ورکړې وو.

د جمهوري غوښتونکو د ګوند سناتور جان کورنی، چې د دې مسودې د اصلي طراحانو څخه یو دی، وويل چې مسوده به په امریکا کې د بهرنیانو د مصئونیت حق له منځه یوسي. دا په دې معنا چې که «یو تن د امریکا پر خاوره ترهګریزو بریدونه تمویلوي نو هغه به د دې د ویجاړیو له پاره هم مسئول بلل کیږي.»

دغې مسودې د سعودي د حکومت غصه راپارولې ده او سعودي چارواکو خبرداری ورکړې چې دوی به د سونو میلیاردو ډالرو په ارزښت امریکایي شتمنۍ خرڅې کړي که چیرې کانګرس دغه اقدامات تصویب کړي. دغه جبري خرڅلاو به د امریکا د محکمو له خوا د شتمنیو د کنګلو د مخنیوي په موخه ترسره شي.

غیر جدي ګواښونه

خو سپینې ماڼۍ د دوشنبې په ورځ وویل چې په دې اړه خوشبینه دي چې د سعودي عربستان حکومت به دغه ګواښونه عملي نه کړي.

د سپینې ماڼۍ ویاند جوش ایرنیست، وویل: «زه باور لرم چې سعودي عربستان پر دې پوهیږي چې موږ د نړیوال مالي سیستم د ثبات له پاره خپلو شریکو ګټو ته ژمن یو.»

دا لا روښانه نه ده چې آیا ولسمشر اوباما به د باچا سلمان او نورو چارواکو سره د خپل سفر په ترڅ کې چې چهار شنبې په ورځ پيلیږي، د دغه مسودې په اړه خبرې وکړي او که نه. د اوباما سفر چې د «خلیج فارس غونډه» کې د ګډون په موخه یې کوي، د اوباما د خدای په آمانۍ د سفرونو یوه برخه ده چې په ترڅ کې به یې نوموړی وروسته د برلین او لندن څخه هم لیدنه وکړي.

د ۱۱ سبتمبر د تروریستي بریدونو د ۱۹ یرغمل نیونکو څخه یې ۱۵ سعودي وګړي ول. خو په دغه ترهګریزو بریدونو کې په رسمي توګه د سعودي د شراکت په اړه کومې پلټنې نه دي ترسره شوي او دغه شاهي حکومت هیڅکله هم په رسمي توګه نه دی متهم شوی.

د ۱۱ سبتمبر د بریدونو د قربانیانو کورنیو له اوباما څخه غوښتنه کړې چې د دغې مسودې ملاتړ وکړي او د خپل سفر پر وخت هم دغه موضوع له پامه ونه غورځوي.

DW.COM