1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

سرچينه: د ۱۱ طالب او حقاني شبکې جنگياليو د اعدام حکم لاسلي سوی

د افغانستان د جمهوري رياست يوې سرچينې د جرمني خبري آژانس (dpa) ته ويلي دي چي په تروريستي جرمونو محکوم ۱۱ کسان به اعدام کړي. دغه پريکړه په کابل کي تر خونړي بريد وروسته سوې.

انځور له ارشيف څخه

انځور له ارشيف څخه

دغي سرچينې چي نوم ئې نه دی ښوول سوی د جرمني خبري آژانس (dpa) ته ويلي دي چي د افغانستان جمهوررئيس اشرف غني د پنجشنبې ورځي په سهار د دغو ۱۱ بنديانو د اعدام حکم لاسلیک کړی دئ.

د افغانستان ځايي تلويزيون «طلوع نيوز» په راپور کي راغلي دي چي دغه ۱۱ بنديان د حقاني شبکې او وسله والو طالبانو غړي دي.

افغان حکومت په رسمي توگه په دې اړه څه نه دي ويلي، خو د افغانستان د رسنيو د راپورونو له مخي په دغو بنديانو کي د حقاني شبکې د موسس جلال الدين حقاني زوی انس حقاني هم شامل دئ.

د چهارشنبې په ورځ په کابل کي يوې چاودني نژدې ۹۰ کسان ووژل او ۴۶۰ نور پکښې ټپيان سول. د دغي چاودني مسئوليت چي سخت مالي او ځاني زيان ئې ورساوه، تر اوسه پوري يوې ډلي هم پر غاړه نه دی اخيستی، خو افغان چارواکي وايي چي دا کار د حقاني شبکې دئ.

د افغانستان ملي امنيت ادارې د چهارشنبې په ورځ ناوخته په يوه اعلاميه کي وويل چي چاودنه د پاکستان د استخباراتي ادارې په ملاتړ حقاني شبکې طرح کړې وه.

د افغانستان د ملي امنيت ادارې پخواني رئيس رحمت الله نبيل په کابل کي تيره ورځ تر خونړۍ چاودني وروسته پخپل پاڼه کي ليکلي ول چي حکومت باید د انس حقاني چي په اعدام محکوم سوی دئ د اعدام حکم پر ځای کړي.

(dpa/NZ)

DW.COM