1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

آلمان او نړۍ

روسيې په کريميا کي پوځي اډې اشغال کړي دي

په داسي حال کې چې اوکرايین له کریمیا څخه خپل پوځونه راباسي، د کیف او مسکو تر منځ په لهجه کې تند والی راغلی دی. په دغه نیمه ټاپو کې روسي قطعات له بېړه څخه کار نه اخلي.

روسي ځواکونو د چهارشنبې په ماښام د تور سمندرگي په نیمه ټاپو کريميا کي د اوکرایین د سمندري ځواکونو د یوې بلې اډې کنترول هم په خپل لاس کې واخیست. دغه کار د کريميا نيمه ټاپو د سیمفيرپول ښار د سویل لویدیځ په ۳۰ کیلومترۍ کې تر سره شوی دی.

د اوکراين پوځ يوه جگړن ایدوارد کسنارینکو له دغي پوځي اډې څخه تر وتلو وروسته ویلي دي: «روسي ځواکونه دلته راغلل او زموږ څخه یې د پوځي اډې د پریښوولو غوښتنه وکړه. موږ دغه کار وکړ.» دا چې خبریالانو غوښتل د دغې پوځې اډې دروازې ته نزدي شي روسي ځواکونو هوایي فيرونه وکړل.

تر دې دمخه روسي ځواکونو په سیواستوپل کې د اوکرايين د سمندري ځواکونو د يوې اډې کنترول تر لاسه کړی وو. په دغه ځای کې د اوکراییني سرتیرو مشري سرگي گايدوک د روسي پلوو ملیشو له خوا نیول شوی وو. مسکو او همداشان کیف د نوموړي د آزادیدو غوښتنه کړې ده.

د اوکرایين مشرتابه له کریمیا څخه د خپلو پوځونو د راایستلو اعلان کړی دی. خو په کیف کې د ملي امنیت شورا مشر اندری پاروبي، دا روښانه کړې ده چې دغه اقدامات مؤقتي دي. مسکو غواړي چې له روسیې سره د کریمیا یو ځای کیدل چې په نړیواله توگه په رسمیت نه ده پيژندل شوې د اوونۍ تر پایه پوري عملي کړي.

په غبرگون کې د اوکرایين د امنیت شورا خپل پوځ د تیارسئ په حالت کي راوستی دی. پر دې سربیره په کیف کې لوېدیځ پلوه مشرتابه د روسي اتباعو له پاره د ویزې د مکلفیت اعلان کړی دی.

د ویزې مکلفیت د سیاسي وسلې په توگه؟

په دې اړه به د اوکرایین د بهرنیو چارو وزیر اړین گامونه واخلي. د داسې قوانین په رامنځ ته کولو سره به په میلیونو روسي اتباع اغېزمن شي، چې په اوکرایین کې خپلوان لري. پر دې سربیره په راتلونکي وخت کې د کریمیا هر هغه اوسیدونکی چې د روسي پاسپورت په بدل کې خپل پاسپورت تبادله کوي، اوکرايين ته د ورتگ پر مهال باید د ویزي غوښتنه وکړي.

د چهارشنبې په ورځ د روسیې ستري محکمې د ولادیمیر پوتین له خوا د روسیې په فیدراسیون کې د کریمیا د شاملیدو لاسلیک شوی تړون تائید کړ. د ستري محکمې رئيس واليري سورکين په سانکت پيتربورگ کې ویلي دي چې دغه سند د روسیې له اساسي قانون سره اړخ لگوي. ولادیمیر پوتین دغه سند چې د لویدیځ له نظره له نړیوالو قوانینو سره په ټکر کې دی، د ارزوني له پاره محکمې ته وړاندي کړی وو.