روسيه غواړي خپل پوځ کوچنی،خو چټک او اغيزمن کړي | دويچه ويله پښتو | DW | 08.05.2009
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

دويچه ويله پښتو

روسيه غواړي خپل پوځ کوچنی،خو چټک او اغيزمن کړي

کله چه د مې پر ۹ روسيه د مسکو په سره ميدان کښي پر نازي آلمان باندي بری لمانځي، نو به يو قوي خو نامطمينه اردو د هغه څخه تيره سي . ځکه چه روسيه اوس په خپل پوځ کي اصلاحات راولي ...

روسي ټانکونه په 2008 عيسوي کال کښي د ګرجستان سره تر جنګ وروسته

روسي ټانکونه په 2008 عيسوي کال کښي د ګرجستان سره تر جنګ وروسته

او 200000 منصبداران به په راتلونکو کلو کښي د پوځ څخه ايستل کيږي . ددې خبري ضرورت د روسيې او ګرجستان سره په وروستي جنګ کښي نور هم ښه معلوم سو،چه بايد روسي پوځ کوچنی،خو چټک او مؤثره وي .

د 2008 ميلادي کال د آگست په مياشت کې روسي ځواکونه په جنوبي اوسيتيا کې د گرجستان پوځ ته په يو څو ورځو کې ماته ورکوي . دا لومړی ځل وو، چې روسان د شوروي اتحاد تر ړنگېدو وروسته د خپل هېواد څخه دباندي جنگېدل . داسې ښکارېدل چې بيا پياوړي شوي روسيې نړيوالو ته خپل قدرت وروښودۍ .

د ډگرجنرال الکزي فومين Alexej Fomin له نظره دې سفربرۍ د روسي پوځ کاواکه (ضعيفه)ټکي هم په ډاگه کړل . نوموړی جنرال وايي :«کله چې زموږ 58 لمبر پوځ بېرته راووت، وسلي او تخنيک په لاروکي خراب سول او د مرمت او جوړيدو د پاره يې هېڅ شی موجود نه وه . د جگړې چمتووالی ډېر خراب دئ . هېڅ معقول ځواب ورته موجود نه وو. نو ځکه گرجيان په دې وتوانېدل چې تر شينوالي Zchinwali پورې مخته ولاړ شي . »

دغه متقاعد جنرال د روسي افسرانو د نړيوالې ټلوالي مشر دئ . د ده ټلواله په سمښتونو کې د پوځ يوه بله کمزورتيا ويني . دی په دې کار کې د روسي پوځ بربادي ويني .

خو د روسيې لوی درستيزتوب بيا برعکس په دې اصلاحاتو کې د جگړو خپلي تجربې په کار اچوي . لوی درستيز نيکولای مکاروف Nikolai Makarow د خپلو عسکرو له حملو وروسته پر ځان باندي دا نيوکه وکوله چې روسي پوځ د سيمه ايزه کشالو په مقابل کي ډېر کاواکه دئ . د اوامرو سلسلې ډېري اوږدې دي .

Russland Wahlkampf Wahlen Armeeangehörige gehen in Moskau zur Wahl

نظامي کارپوه الکزاندر گولڅ Alexander Golz بيا دا اقرار وکړ، چې کريملين په تېرو کالونو کې د نوو وسلو لاس ته راوړلو ته ډېري پيسې ورکړي، خو د پوځ حالت دغومره نه دئ بهتره شوی چې د احساس وړ وي . گولڅ وايي ،« د گرجستان د جگړې نتايجو دغه اصلاحات ډېر گړندي کړل . ځکه روښانه سوه چې : که په اوسني پوځي جوړښت کې هر څومره پيسې ولگول شي، بيا هم داسي ورکيږي، لکه چا چې هسې گوگ ته غورځولي وي . دا ثابته شوې، چې بنسټيز بدلونونه حتمي او ضروري دي . »

اساسي بدلونونه خو اصلاً دا دي چې : روسي مشرتابه به په راتلونکو کالونو کې دوه لکه پوځيان بيکاره کوي . تر 2012 کاله پورې بايد د روسي جنگيالو شمېر نيمايي اندازې يعنی څه ناڅه يو مليون کسانو ته را کم کړل شي . ددفاع وزير اناتولي سرديوکوف Anatoli Serdjukow غواړي د کادر په نامه فرقې بيخي له منځه يوسي . دا هغه فرقې دي، چې په نورمال حالت کې يوازي او يوازي افسران لري او د جنګ په وخت کې بيا احتياط ورکول کيږي .

بياهم الکزاندر گولڅ وايي،«د روس پوځ خپل موجوديت بدلوي . پر ځای د دې چې لويو جگړو ته د مليونو عسکرو په موجوديت سره ځان تيار کړي،له اټومي وسلو پرته به نور يوازي د دې توان ولري چې په سيمه ايزو لانجو کې مداخله وکوي او نور څه نه . دا کار د خارجي سياست له نظره د ډير اهميت وړ دئ . او دا ځکه چې په دې سره په به معلومه سي، چې د ناټو د پوځونو برلاسيتوب نورخپل هر ډول مفهوم له لاسه ورکوي .»

دا په دې معنی چې مسکو د هېواد د دفاع په خاطر پر اټومي وسلو تکيه کوي، او ناټو ته نور د اصلي خطر په سترگه نه گوري . الکزاندر گولڅ وايي چې له دې سره نوره نود سړې جگړې زمانه تېره ده .

سره له دې چې پوځي مشرتابه غواړي پوځ دغومره کم کړي، چې د غم خوړلو وړ وي، مگر بيا هم پوځي کارمندان د خپلو دندو له خاطره اندېښمن دي . پخوانی جنرال فومين په ډاگه کوي ،

«افسرانو سخت ټکان خوړلی دی . ډير کسان نه پوهيږي چې څه به کوي . دوی هر کار پرغاړه اخلي، تر څو خپلو کورنيو ته خواړه پيداکړي . ولو که دوی ته د کورونو ژمنې ورکول کيږي، خو دا وعدې به هېڅکله عملي نسي .»

ايريک البريښت /عارف وردگ

کتونکی : محمد قاسم نوري