1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

د کندهار د ولايتي بيارغوني دفتر تر بريد لاندي راغلی

په دغه ولايت کي د ناټو ځواکونو يو دفتر چي پرمختيايي پروژي پر مخ بيايي تر بريد لاندي راغلی دی. د کندهار ولايت د پوليسو يوه چارواکي چي د نوم د نه ښوولو په شرط يې خبري کولې ويلي دي، چي په سيمه کي څو چاودني هم سوي.

د کندهار د سرې جامعې سيمه

د کندهار د سرې جامعې سيمه

د دغه چارواکي په حواله په پيښه کي يو افغان پولس او يو ملکي وګړی ټپيان سوي دي. ويل کيږي چي د دريو څخه تر پنځو وسله والو کسانو د کندهار د ولايتي بيا رغوني دفتر تر بريد لاندي نيولی دی.

د ناټو ځواکونو هم پيښه تاييد کړې خو نور جزييات يي نه دي ورکړي.

په کندهار کي د ناټو يو بل چارواکي هم پيښه تاييد کړې او ويلي يې دي، چي يو لاسي بم د ولايتي بيا روغوني دفتر په شاوخوا کي هم چاودېدلی دی.

«موږ پوهيږو چي په پيښه کي يو افغان کارګر او يو بل افغان ساتونکی ژوبل سوي دي.»

د کندهار ولايت د پوليسو مشر، جنرال عبدالرازق، ويلي دي چي، افغان چارواکو د کندهار ولايتي بيا رغوني دفتر ته نزدې درې زرنج موټر سايکلونه او يو موټر کشف کړي، چي چاوديدونکي مواد پکښي ځای پرځای سوي ول.

«سيمه اوس د تگ راتگ پر مخ بنده سوې او چاوديدونکي مواد به ډير ژر خنثي سي.»

دغه راز د هغه ولايت په پنجوايي ولسوالۍ کي په د نړيوالو ځواکونو عملياتي پوستې ته څېرمه يو ځانمرگی بريد تر سره سوی.

د کندهار ولايت د امنيتي چارواکو په خبره، دغه بريد مالي او ځاني تاوان نه درلودی.

آژانسونه/ مسعود جهش

کتونکي: نجيب الله زيارمل

DW.COM