1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

د کابل – ننګرهار پر لویه لاره برید یو ماشوم وواژه

د طالبانو یوه شکمن برید د چهارشنبې په ورځ یو ماشوم وواژه او د هغه والدین یې سخت ټپیان کړل. پیښه د کابل ننګرهار پر لویه لاره رامنځ ته شوې ده.

یوه چارواکي ویلي دي چې د امنیتي ځواکونو پر یوې پوستې باندې تر یوه برید وروسته د کابل ننګرهار لویه لار د مسافر پر مخ تړل شوې ده.

د سوروبي ولسوال فهیم موسی زی، ویلي دي چې دغه پیښه په همدې ولسوالۍ کې رامنځ ته شوې ده. هغه زیاته کړې ده چې اوس لویه لار د امنیتي ځواکونو له خوا تړل شوې ده او له مخالفینو څخه د سیمې د پاکولو په موخه عملیات روان دي.

موسی زي ویلي دي چې طالبانو له یوې تپې څخه د امنیتي ځواکونو پر یوې پوستې باندې ډزې کړې دي او پر لویه لاره یو روان موټر یې ویشتلی دی.

لا تر اوسه پورې کومې ډلې د دغه برید پړه پر غاړه نه ده اخیستې.

د کابل ننګرهار لویه لاره د افغانستان له مهمو لویو لارو څخه شمیرل کیږي چې د دې هیواد پلازمینه له ختیځو ولایتونو سره نښلوي.

DW.COM