1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

آلمان او نړۍ

د پاريس په عملياتو کي ۷ کسان نيول سوي دي

په پاريس کي د بريدونو د شکمن طراح عبدالحميد اباعود پسې عمليات پای ته ورسېدل. د فرانسې پوليسو ويلي دي چي په دغو عملياتو کي چي د پاريس په شمال کي ترسره سول دوه تنه وژل سوي او ۷ شکمن کسان نور نيول سوي دي.

د ترهگرۍ پر ضد دغه عمليات د چهارشنبې ورځي په سهار (۲۰۱۵م کال د نوامبر ۱۸مه) د عبدالحميد اباعود، د نيولو له پاره پيل سوي چي په پاريس کي د يرغلونو تراح بلل کيږي. اباعود بيلجمی دئ.

د راپورونو له مخي د فرانسې ځانگړي ځواک د پاريس په شمال سن دني، سيمه کي پر يوه اپارتمان باندي يرغل کړی دئ. ويل کيږي چي په دغه اپارتمان کي څو نور شکمن کسان هم پټ ول.

د فرانسې چارواکو ويلي دي چي د دغو عملياتو په ترڅ کي ئې ۷ کسان نيولي دي، خو دا لا روښانه نه ده چي په هغوی کي اباعود شامل دئ که نه.

داسي ويل کيږي چي هغه شکمن کسان چي په دغو عملياتو کي نيول سوي دي، په پاريس کي د يوه بل تروريستي بريد په پلان بوخت ول.

د وروستيو راپورونو له مخي په دغو عملياتو کې تر اوسه دوه تنه وژل سوي دي. په وژل سوو کسانو کي يوه ښځه ده چي ويل کيږي خپله ئې ځان چولی دئ او يو نارينه له پوليسو سره په فايرونو کي وژل سوی دئ. د څو تنو پوليسو د ټپي کيدو خبر هم ورکړل سوی.

له فرانسې څخه د رسنيو د راپورونو له مخي د پاريس په شمال سن دني سيمه کي د ترهگرۍ پرضد عملياتو پرمهال د اوو چاودنو ږغونه اورېدل سوي دي.

د دغه اپارتمان شاوخوا اوسېدونکو ته خبر ورکړل سوی چي په خپلو کورونو کي پاته سي. پر سمي باندي څرخۍ الوتکي هم گرځي.

په پاريس کي د جمعې په ورځ په تروريستي بريدونو کي ۱۲۹ انسانان ووژل سول او ۳۵۰ نور ټپيان سول. له هغه وروسته په پاريس او بلجيم کي تلاښۍ رواني دي.