1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

آلمان او نړۍ

د وژل شوې آلمانۍ ژورنالیستې له پاره ویر

په افغانستان کې د وژل شوې عکاسې ژورنالیستې آنیا نیدرینگ هاوس، د ویر په مراسمو کې چې د شنبې په ورځ یې په خپل پلرني ښار «هیوکستر» کې ونیول شول، د هغې د کورنۍ غړو، کورني او بهرني دوستانو او همکارانو گډون وکړ.

آلمانۍ عکاسه ژورنالیسته انیا نیدرینگ هاوس، د افغانستان د ولسمشرۍ له ټاکنو څخه یوازې یوه ورځ مخکې د خوست په ولایت کې د یوه افغان پولیس له خوا ووژل شوه. په داسې حال کې چې د افغانستان امنیتي چارواکي د هغې له قاتل څخه تحقیقات کوي، د آنیا نیدرینگ هاوس، د نارد راین وېستفالن د ایالت د «هیوکستر» په ښار کې چیرې چې هغه زیږیدلې وه، د ځانگړو مراسمو په ترڅ کې خاورو ته وسپارل شوه. د هغې د ویر په مراسمو کې د کورنۍ غړو او د همکارانو په شمول یو گڼ شمیر خلکو گډون وکړ او د هغې له کورنۍ سره یې خپله خواخوږي څرگنده کړه.

انیا نیدرینگ هاوس، چې ۴۸ کاله عمر یې درلود، د امریکا متحده ایالاتو د غیر حکومتي خبري آژانس اسوشیتد پرس، له پاره کار کاوه. آنیا نیدرینگ هاوس، له خپلې کاناډایې همکارې کتي گانون، سره د خوست ولایت یوې سرحدې سیمي ته تللې وه چیرته چې هغوی غوښتل د افغانستان د دیموکراتیکو ټاکنو څخه د خپلو انځوورونو په واسطه نړیوال خبر کړي. پر دغې ژورنالیستې او د هغې پر همکارې د خوست ولایت د تڼیو په ولسوالۍ کې د پولیسو په امنیت لرونکي قرارگاه کې، يو پولیس په ناڅاپي توگه برید وکړ چې په نتیجه کې یې نیدرینگ هاوس، ځای پر ځای مړه او د هغې کاناډایي همکاره سخته ټپي شوه.

په ۲۰۰۱ کال کې د طالبانو د رژیم له نسکوریدو راهیسې په افغانستان کې د رسنیو وده ډیره پراخه ده. خو په عین وخت کې د ژورنالستانو ژوند ته خطرونه هم وار په وار زیاتیږي. د نوموړې آلمانۍ له وژلو څخه څو اوونۍ مخکې په کابل کې یو سویډني او یو افغان ژورنالیست له خپلې کورنۍ سره د زور زیاتیو قرباني شو.

انیا نیدرینگ هاوس او کانادایي ژونالیستې کیتي گانون، په دغه موټر کې سپرې وې

انیا نیدرینگ هاوس او کانادایي ژونالیستې کیتي گانون، په دغه موټر کې سپرې وې

په منځني او نزدې ختیځ کې ژورنالستي فعالیتونه

نیدرینگ هاوس، یوه ډیر زړه وره ژورنالیسته وه. هغې د جگړې له ډگرونو څخه د انځورونو په چمتو کولو سره نړیوال شهرت پیدا کړ. د ژورنالیستانو له پاره د امریکایي جایزې، «پولیتڅر» دغې گټونکي له ۲۰۰۲ کال څخه له منځني ختیځ، لیبیا، افغانستان او پاکستان څخه رپوټونه ورکړي دي. د هغې د وژلو پیښه د هغو ژورنالیستانو زیار او ستونزو ته پام اړوي چې همدا اوس د جگړو او وسلوالو نښتو له ډگرونو څخه رپوټونه جوړوي. دا پیښه څرگندوي چې ژورنالیستان په ډیرو ناخوالو کې کار کوي او خپل ژوند له خطر سره مخامخوي ترڅو نړیوال د پیښو له جزئیاتو څخه خبر کړي.

د بی سرحده ژورنالیستانو د سازمان د معلوماتو له مخې د ۲۰۰۹ څخه تر ۲۰۱۳ میلادي کلونو پورې په ټوله نړۍ کې ۳۵۸ ژورنالیستان او د رسنیو کارکوونکي وژل شوي دي. د دغه سازمان د وینا له مخې سوریه، هند، فیليپین، سومالیا او پاکستان د ډیرو خطرناکو ځایونو څخه شمیرل کیږي.