1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

آلمان او نړۍ

د نړۍ تر ټولو زوړ وگړی ۱۲۳ کلن شو

کارمیلو فلوریس لاورا ادعا کوي چې په ۱۸۹۰ کال کې زیږیدلی. که په دې اړه موجود اسناد دقیق وي نو هغه د نړۍ تر ټولو زوړ ژوندی وګړی دی. فلوریس خپل ټول ژوند د لاتینې امریکا په هیواد بولیویا کې تیر کړی دی.

هغه وخت چې کارمیلو فلوریس لاورا نړۍ ته راغی نو په بولیویا هیواد کې د «زیږد د نیټې د ثبتولو سندونه» موجود نه ول. خو هغه اسناد چې دی یې په لاس کې لري ښيي چې د «اندیس» غرونو دغه اوسیدونکی د ۱۸۹۰ کال د جولای میاشتې په ۱۶ نیټه نړۍ ته راغلی دی.

فلوریس لاورا د اندیس غرونو په لمنه کې یو کور لري. که د دغه وگړي عمر تأیید شي نو هغه به د نړۍ د تر ټولو زوړ ژوندي وگړي په توگه د «جینس د ریکاردونو» په کتاب کې ثبت شي.

فلوریس لاورا لیک لوست نه شي کولای. هغه شپون دی چې په خپل اوږد عمر کې ډیر کم وخت له خپل کلي کوره لیرې شوی دی. د هغه ښځه لس کاله مخکې مړه شوه او له هماغه وخت راهیسې دغه ۱۲۳ کلن وگړی یوازې ژوند کوي.

فلوریس لاورا وايي چې د اوږد ژوند راز یې دا دی چې په خپل اوږد ژوند کې یې نه مکروني خوړلي او نه هم بوره. هغه وایي: «موږ یوازې هغه څه خوړل چې په دښتو کې موندل کیده.» هغه زیاتوي، کله چې یې ښځه ژوندۍ وه نو تل به یې هغې سره مرسته کوله: «ما تل له خپلې میرمنې سره په پخلي کې مرسته کوله. هیڅ وخت مې هم د تنبلي احساس نه دی کړی.»

کارمیلو فلوریس لاورا وایي چې یوازې غوږونه یې یو څه درانه شوي او نور له ډیر ښه روغتیایي حالته برخمن دی.

کارمیلو فلوریس لاورا وایي چې یوازې غوږونه یې یو څه درانه شوي او نور له ډیر ښه روغتیایي حالته برخمن دی.

۱۲۳ کلن فلوریس لاورا وایي چې اوس هم هره ورځ د اوږد وخت له پاره په پښو مزل وهي. هغه زیاتوي چې ټول ملگري یې مړه شوي دي: «هغوی مې ډیر یادیږي. زه په دې سیمه کې د خپل وخت یوازینی ژوندی کس یم.»

فلوریس لاورا ۱۶ لمسیان او ۳۹ کړوسیان لري. د هغه یوازې یو زوی ژوندی دی چې ۶۷ کاله عمر لري.