1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

د ننگرهار د ولايت شورا غړې انگېزه ښخه سوه

د ننګرهار د ولایتي شورا غړې انګېزه شینوارې ښخه شوه. هغه د فيبرورۍ مياشتي پر لسمه نېټه د جلال اباد ښار په دوهمه ناحیه کې هغه مهال سخته ټپي شوه چې پر موټر باندي یې نښلول شوی ماین وچاود.

له انگېزې سره په دغه چاودنه کې د هغې خوريی چې موټر يې چلاوه ځای پر ځای ووژل شو او د ښوونځي درې زده کوونکې سختي ټپیاني شوې.

له دغو زده کوونکو څخه يوې يې یوه ورځ وروسته په روغتون کې سا ورکړه او انګېزه شینوارې د درملني له پاره کابل ته ولیږدول شوه.

انگېزه د کابل په سردار محمد داود خان روغتون کي بستر وه او د يکشنبې ورځي په مازيگر يې د سختو ټپونو له امله سا ورکړه.

انگېزې ته د دوشنبې په ورځ دوې بجي د جلال آباد په شېرزي لوبغالي کې د جنازې لمونځ ورکړل شو او د پوهنتون روغتون ته څیرمه ښخه شوه.

د انگېزې د کورنۍ غړی نوید شینواری وايي چې هغې پر ځان منلې وه چې د یوې ځواني مدني فعالې په توګه د مرګ په ګډون هره قرباني منلې وه.

د ننګرهار اوسیدونکی او ځوان لیکوال نور ولي سعید شینواری وايي: «انگېزي، نارینه خاصیتونه درلودل، زړورتیا ته یې موږ د څنګ دوستان هم ورته تسلیم وو. ښه مي په یاد دي چې اچین ته د مدني فعالیتونو په یو سفر ورسره ولاړو، هلته یې یو سپین ږیری بوډا تر ږیري ونیو، ویل بابا د خدای په لحاظ، ښځو ته نور دومره په سپک نظر مه ګورئ، راشئ ښوونځي ته یې راولېږئ او خپل کورته روڼا راولی.»

انگېزه څوک وه؟

انگېزه د ۱۳۵۵ لمریز کال د ثور مياشتي پر ۲۵ نېټه د ننګرهار ولایت د اچین ولسوالۍ په شینوارو کې زېږېدلې وه. پلار يي محمد کبیر پوځي منصبدار د ډاکټر نجیب الله د واکمنۍ پرمهال ووژل شو.

انگېزې د ننګرهار د مرکز جلال اباد له الايي لېسې څخه فارغه او اوس د دغه ولايت پوهنتون د ښوني او روزني د شپې پوهنځی محصله وه.

هغې د کليد په نوم شبکې، د ننګرهار په سیمه یزو راډیوګانو او چاپي خپرونو کې په کارکولو سره د یوې فعالي خبریالې په تړگه وپیژندل شوه او وروسته د ولایتي شورا په ټاګنو کې يې ځان کانديد او بریالۍ شوه. انگېزه د ۲۰۱۴م کال د ولايتي شورا په ټاکنو کي هم بريالۍ شوه.انگېزه، گونډه مور يو ورور او دوې خويندي لري.