1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

اروپا ته مهاجرت

د مهاجرو مرستندويه سازمان پروازيول ۳۰ کلن سو

پرو ازيول د درو لسيزو راهيسي فعاليت لري. د دغه سازمان د رئيس ګيونتر بورخارد سره د ځانګړې مرکې مهم ټکي دلته لوستلای سئ:

په آلمان کي د مهاجرو د ملاتړ سازمان پروازيول (Pro Asyl) درې لسيزي تر مخه تأسيس سو. د دغه سازمان اوسني رئيس ګيونتر بورخارد د آلمان ږغ سره په مرکه کي وويل چي ده او نورو ملګرو يې هغه وخت د دغه سازمان د جوړولو اراده وکړه، کله چي د پناه غوښتونکو له پاره په آلمان کي وضعه د تغير په حال کي وه.

د نوموړي په وينا هغه وخت په ټاکنيز کامپاينونو کي د بعضو سياسي ډلو له خوا د مهاجرو پر ضد له توکمپالنې ډک تبليغات شروع سول او د پناه غوښتنې د قانون پر ضد شعارونه ورکول سول. د بورخارد په وينا همدا وجه وه چي دوی د پرو ازيول سازمان د مهاجرو څخه ملاتړ له پاره تأسيس کړ.

بورخارد وايي چي په داسي حال کي چي پخوا يې يوازي په آلمان کي د پناه غوښتونکو په حق کي ږغ پورته کاوه او په ټوله اروپا کي د مهاجرو له حقونو څخه دفاع کوي. د بشري حقونو دغه فعال وايي چي دمګړی د مهاجرت له پاره وضعه ډېره خرابه سوې ده. د هغه په وينا په داسي حال کي چي د آلمان لومړۍ وزيره انګېلا مېرکل د بشر د حقونو مدافعه او فعاله احساسيږي خو په اصل کي د ترکيې سره د مهاجرو په تړاو تړون یو برعکس خبره ده.

ګيونتر بورخارد

ګيونتر بورخارد

د اروپا د مهاجرت قانون سم نه دی طرحه سوی

د آلمان ږغ سره د مرکې پر وخت د پرو ازيول رئيس وويل چي د مهاجرو د روان بحران تر هوده وتلو په لار کي يو لوی خنډ پخپله په اروپا کي د مهاجرت ناسم طرحه سوی قانون دی. هغه هيواد چي ورته مهاجر د لومړي ځل له پاره داخل سي، هغه هيواد د هغه مهاجر له پاره مسؤل دی، چي دا د دې لامل ګرځي چي هغه هيوادونه چي پر لاره يې زيات مهاجر اروپا ته داخليږي، د مهاجرو د منلو، د پناه غوښتنې د دوسيې په د پرمخ بيولو او د ادغام په ترڅ کي بندښونه رامنځ ته کوي.

بورخارد وايي چي په اروپا کي چي بعضي حساسيتونه د مهاجرو د بحران په ترڅ کي رابرسېره سوي دي، د هغه اصلي لامل مهاجر نه دي بلکه دا پوښتنه ده چي اروپا غواړي پر کور لور ولاړه سي او منزل مقصود يې څه شی دی؟

د پرو ازيول رئيس وايي چي په نړيواله توګه د مهاجرينو وضعه ښه نه ده. هغه وايي چي د ترکيې سره د اروپايي اتحاديې تړون د دې لامل سوی چي ترکيې د سوريايانو پر وړاندي د ويزې مکلفيت رامنځته کړی دی. د هغه په وينا له دې کبله سوريايان نور نه سي کولای له جګړې وتښتي ولي چي د ترکيې سرحد پر تړل سوی دی. بورخارد وايي چي د کينيا په داداب کي چي د نړۍ تر ټولو لوی مهاجر کمپ ؤ هغه هم د تړل کېدو د ګواښ سره مخامخ دی. بورخارد وايي چي په داسي حال کي چي د اروپا بډای هيوادونه مهاجر نه مني نو د افريقا هيوادونه او د آسيا هيوادونه لکه پاکستان هم وايي چي موږ يې هم نه منو.

د بورخارد په وينا په نړۍ کي د مهاجرو د حقونو او د هغوی د قبولولو په ترڅ کي پرشاتګ روان دی. خو هغه وايي چي سازمان به يې خپلو مبارزو ته ادامه ورکړي.

پر ورته موضوع یو انځوريز البوم زموږ له آرشيف څخه (28.08.2016):

DW.COM