1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

د معروف اوسیدونکي د پاکستان له مداخلې سر ټکوي

د کندهار د معروف ولسوالۍ خلک، پاکستاني مليشې د هغو طالبانو په ملاتړ تورونوي چي وخت ناوخت په دغه سيمه کي پر امنيتي پوستو، ودانيزو شرکتونو او عامه تاسيساتو بريدونه کوي.

«طالبان له پاکستانيو مليشو له همکارۍ پرته هيڅ راز وړتيا نه لري»

«طالبان له پاکستانيو مليشو له همکارۍ پرته هيڅ راز وړتيا نه لري»

معروف د کندهار هغه ولسوالي ده، چي د کندهار ښار په يو سل او نوي کيلومتره پرته ده او له پاکستان سره اوږده پوله لري.

د دويچه ويله خبريال د يکشنبې په ورځ له دغه ولسوالۍ څخه ليدنه کړې او د خلکو سره ږغيدلی دی.

جلالزی ليکي چي، د معروف ولسوالۍ يو شمير اوسيدونکو او ځايي حکومتي مامورين د پاکستاني مليشو له مداخلي څخه شکايت وکړ او زياته يې کړه چي که پاکستاني پوځيان له طالبانو سره همکاري و نه کړي نو هغوی په يوازي سر ولسوالۍ ته نسي را اوښتی.

د معروف دوو اوسيدونکو چي نه يي غوښتل نومونه يي خپاره سي دويچه ويله ته وويل چي طالبان له پاکستانيو مليشو له همکارۍ پرته هيڅ راز وړتيا نه لري.

« طالبان د پاکستانيو مليشو اوخاصه دار ځواکونو له همکارۍ پرته معروف ته نسي راتلای، موږ د پاکستان له مداخلو په تنګ سوي يو».

د معروف ولسوالي د کندهار له ارغستان ولسوالۍ او همدا راز د نا امنه زابل له اټغر ولسوالۍ سره ګډه پوله لري چي پاکستان هم ورسره په خوا کي پروت دی.

د معروف د پوليسو مشر دويچه ويله ته وويل، چي د دوی تر حاکميت لاندي سيمه هم د افغانستان د نورو هغو ولسواليو په څير د پاکستان له لاسه نا امنه ده چي د ملک په نورو برخو کي له دغه ګاونډي سره اوږده پوله لري.

قوماندان نادر خان وايي: « د دښمن څو ګروپونه دي چي د پاکستان په خاوره کي اوسيږي، د شپې له لوري زموږ پر سرحدي تاڼو بريدونه کوي».

د معروف ولسوالۍ له يو شمير خلکو سره په مرکو کي دا څرگنډه سوه چي د دغي سيمي ډيری اوسيدونکي د امنيتي ځواکونو له کړنو څخه خوښ دي.

په معروف ولسوالۍ کي دمګړی يوازي سرحدي او د عامه نظم پوليس ځای پر ځای دي.

د يادي ولسوالۍ ولسوال عبدالصمد دراني هم وويل، چي دوی د پاکستان د مداخلي په باب څو واري له مرکزي حکومت سره خبري کړي او دغه مسله يې د هغو تر غوږ ور رسولې خو داسي ښکاري چي تر اوسه په دغه برخه کي د کابل حکومت له اسلام آباد سره اړيکه نده نيولې.

« طالبان هر وخت د پاکستان له لاري را اوړي، دلته غلچکي حملې کوي، او بيرته د خپلي پناه له پاره پاکستان ته اوړي، هلته اوسيږي او د پاکستان سرحدي تاڼې او پوليس يې ملاتړ کوي».

کندهار چي د افغانستان په جنوب کي پروت دي له سياسي اړخه د جنوبي ولايتونو امنيت ور پوري تړلي دي.

اوس حکومت هڅه کوي چي د دغه ولايت هغو ولسواليو ته ملکي حکومت ولي ور پراخه کړي کومي چي تير کال د خونړيو نښتو په ترځ کي له طالبانو نيول سوي دي.

ميرويس جلالزی/ کابل

کتونکی: نجيب الله زيارمل

DW.COM