1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

د لغمان د ښځو چارو رئيسه ووژل سوه

د لغمان امنيتي چارواکي وايي، چي د دغه ولايت د ښځو چارو رئيسه د نامعلومو وسله والو کسانو له خوا ووژل سوه. په يوه بله پيښه کي بيا د نيمروز امنيه قومندان وژل سوی دئ.

Najia Sidiqi head of women affaires office in Laghman who got killed in Laghman on Monday.10.12.2012. Aufgenommen am 24.11.2012 in der Stadt Mehcar Lam, Provinz Laghman, Afghanistan. Photo: Laghman Governor media office Bild geliefert von DW/Mohammad Gol Ahmad.

Afghanistan Frauenbeauftragte Nadschia Seddiki Archibild

پوليسو ويلي دي، چي ناجيه صديقي د دوشنبې په ورځ (۲۰۱۲ کال د دسمبر۱۰) سهار هغه مهال د نامعلومو وسله والو کسانو له خوا ووژل سوه، چي له کور څخه دفتر ته روانه وه.

ناجيه صديقي د روان کال د جولای په مياشت د حنيفې صافي ځای ناسته سوه. حنيفه صافي د يو موټربم په چاودنه کي ووژل سوه.

په یوه بله پيښه کي د نيمروز ولايت امنيه قومندان محمد موسي رسولي وژل سوی دئ. روسلي د هرات ولايت په ادرسکن ولسوالۍ کي د سړک د غاړي يوه ماين په چاودنه کي د دوشنبې د ورځي په سهار ووژل سو.

د نيمروز امنيه قومندان محمد موسی رسولي

د نيمروز امنيه قومندان محمد موسی رسولي

د دغه دواړو پيښو پړه تراوسه پوري چا پرغاړه نه ده اخيستې. خو ډيری وخت د دغه ډول پيښو پړه په افغانستان کي وسله وال طالبان پرغاړه اخلي او هغه څوک چي له افغان دولت سره کار کوي، د دوی د بريدونو هدف گرځي.

په افغانستان کي د طالبانو د واکمنۍ پرمهال له ۱۹۹۶ څخه تر ۲۰۰۱ عيسوي کاله پوري په منظم ډول د ښځو حقونه تر پښو لاندي کېدل.

د پنجشنبې په ورځ د يوه ځانمرگي بريد کوونکي له خوا د افغانستان د ملي امنیت رئيس اسدالله خالد هم سخت ټپي سو.

د افغانستان جمهوررئيس حامد کرزي د دوشنبې په ورځ ويلي دي، چي د اسدالله خالد روغتيايي وضعيت د ښه کېدو په حال کي دی.

هغه ويلي دي، چي خالد به د درملني له پاره له هيواده دباندي ولېږل سي. خالد اوس په کابل کي په يوه پوځي روغتون کي بستر دئ.

يوه افغان چارواکي د فرانسې خبري آژانس ته ويلي دي، چي خالد خبري نسي کولای خو پوهيږي چي څه ورباندي تيريږي.

ويل کيږي چي خالد په نس کي ټپي سوی دئ، او د بدن حياتي غړو ته ئې تاوان نه دی رسېدلی.