1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

د افغانستان بيا رغاونه

د لعلپورې د ولسوالۍ د پل چارې بشپړې شوي

د لعلپورې ولسوالۍ له پاره دغه اوږد پُل چې نږدې درې کاله وړاندې ئې د بنسټ ډبره کېښودل شوې وه، چارې ئې بشپړې او د یوې غونډې په ترڅ کې ګټې اخیستنې ته وسپارل شو.

دغه پل ۳۰۰ متره اوږدوالی لري او په نړیوال ستندرد جوړ شوی.

دغه پل ۳۰۰ متره اوږدوالی لري او په نړیوال ستندرد جوړ شوی.

نوموړي پل چې د ننگرهار ولایت د لعلپورې په ولسوالۍ کې جوړ شوی، پرې ۶ میلونه او ۵۰۰ زره امریکایي ډالره لګښت  راغلی. د لعلپورې ولسوالۍ پُل تر بشپړېدو وروسته ګټې اخیستنې ته وسپارل شو. د چارواکو په وینا دغه اوږد پُل چې ۳۰۰ متره اوږدوالی او ۱۴ متره پلنوالی لري  ۵۰۰ زره خلک به ترې ګټه پورته کوي.

  د ننګرهار والي ګل اغا شېرزي غونډې ته دوینا پرمهال وویل چې د نوموړي پل لګښت د بیا رغونې امریکایی ډلې، پي آر ټي له خوا ورکړل شوی دئ.

د ولایتی بیارغونې د ټیم، پي آر ټي یو تن انجینر قمرزمان د پل پر تخنیکي اړخونو خبرې وکړې او وېویل چې دغه پل په ټولو معیارونو سنبال او د ۳۰ مترو په ژوروالي سره په  ۳۶ پایو ولاړ دئ: « دغه پل ۳۰۰ متره اوږدوالي لري او په نړیوال سټندرډ برابر جوړ شوی دئ.»

 د سیمې یو شمېر قومي مشرانو رسنیو سره په خبرو کې وویل، چې دوی دیاد پُل پر جوړیدو ډیر خوښ دي او د دوی په ژوند کې به له دې ورو سته ډیر مثبت بدلون رامنځ ته شي .  د دوی په خبره چې له دې وړاندې دوی له ګڼو ستونزو سره لاس او ګرېوان وو او ډیری وخت به د تګ راتګ پرمهال له سختو مشکلاتو سره مخ کېدل.

تر دې د مخه په لغمان ولایت کې هم یو پل گټې اخیستنې ته سپارل شوی.

تر دې د مخه په لغمان ولایت کې هم یو پل گټې اخیستنې ته سپارل شوی.

له دغو مشرانو څخه یو تن بنارس چې د لعلپوري اوسیدونکی دئ دویچه ویلې ته وویل: « د دې پل په جوړیدو ډیر زیات خوښ یو. مخکې به په کشتیو کې خپل کلي ته اوښتو چې وخت ناوخت ئې ډیرې ناوړه پيښې هم رامنځ ته کړي دي.»

د لعل پورې په ولسوالۍ کې دغه جوړ شوې  پل د ننګرهار د حلقوي سرک په اوږدو کې جوړ شوې چې د ګوشتې، کامې، لعل پورې، د مهمندرې او د شینوارو لوی ولسوالۍ سره نښلوي. دا لومړی ځل دئ چې په تېرو لسو کلونو کې په ختیځه سیمه کې دغه ډول اوږد او اساسي پُل جوړيږي .

ننگرهار/ شمع احمدزی
کتونکی: سید ریاض