1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

د راروانو ټاکنو امنیتي پلان بشپړ شو

د افغانستان د کورنیو چارو وزارت وایي چې د راروانو ولسمشریزو او ولایتي شوراګانو د ټاکنو امنیتي پلان یې تر ډيرو بحثونو وروسته بشپړ، او د ټاکنو خپلواک کمیسیون ته یې سپارلی دی.

ARCHIV - An Afghan voter shows her inked-finer after casting her ballot at a polling station, during parliamentary elections, in volatile Kandahar, Afghanistan on 18 September 2010. Despite the presence of more than 400,000 Afghan and international forces, election authorities said more than 1,000 polling stations in the south and east of the country could not be opened for security reasons, denying around 1.5 million Afghans the possibility of voting. Photo: EPA/HUMAYOUN SHIAB (zu dpa Jahreschronik - Die wichtigsten Ereignisse des Jahres 2010) +++(c) dpa - Bildfunk+++

Jahresrückblick 2010 International September Wahlen in Afghanistan

په دغه پلان کې د ټولو ۶۸۴۵ وړو او لویو ټاکنیزو مرکزونو نقشې، د لویو لارو د امنیتي پوستو او هر مرکز ته د ځانګړو شویو امنیتي ځواکونو ښوول شوی دی.

د کورنیوو چارو وزارت ویاند صدیق صدیقي، د دوشنبې په ورځ په کابل کې د یوې خبرې غونډي پرمهال وویل چې افغان امنیتي ادارو د ټاکنیزو مرکزونو امنیتي پلان بشپړ کړی دی. هغه ټینګار وکړ چې د «دښمن» هیڅ راز دسیسه به خلک د رایه اچولو له بهیر څخه را و نه ګرځوي.

صدیقي دا خبره ومنله چې طالبانو په یو شمیر لیرو پرتو سیمو کې خلکو ته ګواښونه کړي دي چې په ټاکنو کې ګډون و نه کړي، خو هغه ټینګار وکړ چې افغان ځواکونه به په دغو سیمو کې حضور ولري او له همدې کبله به د افغان حکومت وسله وال مخالفین د رای اچوونې د بهیر مخه و نه شي نیولای. صدیقي وویل چې دا ځل به افغان ځواکونه د ۲۰۰۹ کال د ټاکنو په پرتله په کلیو او لیرو پرتو سیمو کې ډیر فزیکي حضور ولري. هغه زیاته کړه: «د ټاکنو کمیسیون ته مو ډاډ ورکړ چې موږ د ۶۸۴۵ مرکزونو امنیت ساتلو ته چمتو یو [...] موږ سر له اوسه بشپړ ترتیبات لرو او د ټاکنو خپلواک کمیسیون دې په دغه برخه کې هیڅ راز اندیښنه و نه لري.»

افغان چارواکي په داسې حال کې د ټاکنو د امنیت ټینګولو خبره کوي چې ویل کیږي اوس هم طالبان د پنځو ولسوالیو کنترول په لاس کې لري. دغه ولسوالۍ په هلمند، غزني او زابل ولایتونو کې پرتې دي.

د افغانستان د کورنیو چارو وزارت ویاند روښانه کړه چې د راروانو ټاکنو د امنیت ټینګولو په برخه کې به له سیمه ییزو پولیسو څخه هم مرسته واخیستل شي. هغه وویل: «موږ ټاکنې تر سره کوو او له خلکو غواړو چې له پولیسو سره همکاري وکړي.»

د ټاکنیزو مرکزونو اکمالول

ویل شوي دي چې د رایه اچونې د ۴۴۱ لویو مرکزونو له ډلې څخه ۴۲۵ ته یې ټول لازم مواد استول شوي دي. په همدې حال کې په افغانستان کې د ناټو ویاند هاینس فلدمن، هم د ټاکنو په بهیر کې د خپلو قواوو د امنیتي او لوجیستیکي ملاتړ خبر ورکړ.

هغه وویل چې ناټو به د تیر وخت په څير په دغه برخه کې د افغان ځواکونو د غوښتني په صورت کې خپل امکانات له هغوی څخه و نه سپموي. ښاغلي فلدمن وویل: «موږ له خپلو افغان ملګرو سره د هغوی د غوښتنې په صورت کې مرستې کوو. دا هغه څه دي چې نړیولو ځواکونو پخوا هم ویلي وو.»

په افغانستان کې په ۲۰۱۴ کال کې ولسمشریزې او د ولایتي شوراګانو ټاکنې کیږي. پلان شوې ده چې په همدې کال کې ټول بهرني جنګي ځواکونه هم له افغانستان څخه ووځي او د دغه هیواد امنیتي مسوولیتونه پخپله افغانانو ته وسپاري. ډیر شمیر افغانان اندیښنه لري چې افغان ځواکونه به په یوازیتوب د ټاکنو امنیت ټینګ نه شي کړای.

DW.COM