1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

د تالقان په احتجاجونو کي ډیر شمیر کسان ژوبل شول

د افغانستان په شمال تالقان کي هغه وخت ولسي کسانو ته مرگ ژوبله واوښتله کله چي احتجاج کوؤنکو پدې تور چي ناټو په خپلو عملياتو کي ولسي کسان وژلي دي د احتجاج پر وخت په تاو تريخوالي لاس پوري کړی.

آرشيف انځور

آرشيف انځور

ويل سوي چي احتجاج کوؤنکو چي تبرونه او سوټيانو سنبال ول پر امنيتي کسانو ډبري واورولې چي په ترځ کي پوليسو ورباندي ډزي وکړې. د پوليسو په ډزو کي د 11 مظاهره کوؤنکو د وژل کېدو تر څنگ د 50 نورو د ژوبل کېدو خبر هم ورکول سوی دی.

په راپورونو کي ويل سوي چي د چهار شنبې په ورځ په تالقان کي په سلگونو په غوسه احتجاج کوؤنکو د ولسمشر کرزي انځورونه وسوځول او په افغانستان کي يې د بهرني ځواکونو پر ضد شعارونه ورکول.

احتجاج کوؤنکي تور لگوي چي ناټو د سه شنبې او چهار شنبې په منځنۍ شپه په پوځي عملياتو کي څلور ولسي کسان وژلي دي. خو ناټو بيا وايي چي دوی د افغان امنيتي ځواکونو په ملگري د وسله والو پر ضد عمليات تر سره کړل چي پکښي دوه نارينه وسله وال او دوې وسله والې ښځي ووژلې سوې.

له بلې خوا د ځايي پوليسو مشر نوري ويلي دي چي وژل سوي کسان وسله وال نه بلکه ولسي خلک دي. نوري و راېټرز خبري آژانس ته ويلي دي « زه په سخته سره د دغه خونړي بريد غندنه کوم.» نوري د تخار څخه د ټليفون پر کرښه و رايټرز خبري آژانس ته ويلي دي چي وژل سوي کسانو د وسله والو سره هيڅ اړيکي نه درلودې او دغه ماښامني عمليات د ناسمو استخباراتي معلوماتو پر اساس تر سره سوي دي.

د ځايي پوليسو مشر نوري زياته کړېده: « دغه ډول عمليات به د افغان حکومت او د هغه د بهرنيو ملگرو سره د ولس واټن لا زيات کړي. »

د ايساف په خبرپاڼه کي راغلي چي دوی د ازبکستان د اسلامي غورځنگ څلور وسله وال غړي وژلي دي چي پکښي دوې مېرمني شاملي دي. د ايساف په خبرپاڼه کي راغلي:

« يوې ښځي چي AK-47 مشينگڼ يې په لاس کي ؤ په نښته کي برخه واخيسته. امنيتي ځواکونو په څو څو ځله ورته په لوړ ږغ خبردرای ورکړی خو دغې مېرمنې پر ځواکونو د توپک مشوکه برابره کړې وساتله او پدې ترځ کي ووژله سوله.»

آرشيف انځور

آرشيف انځور

دا لومړی ځل ندی چي په افغانستان کي د ولسي کسانو د وژنې پر سر د ولسي کسانو او بهرنيو ځواکونو لخوا بيلي ادعاوي کيږي. د دې څخه تر مخه هم د ولسي کسانو وژنه د افغان حکومت او بهرنيو ځواکونو تر منځ يوه شخړيزه موضوع پاته سوې ده.

کارپوهان وايي چي د ولسي کسانو د وژنو موضوع د بهرنيو ځواکونو هغه هڅې هم زيانمنې کړيدي چي د افغانانو زړونه وگټي.

د تخار د ولايتي روغتون يوه ډاکټر سيد احمدي و رايټرز خبري آژانس ته د دې پخلی کړی دی چي تر اوسه پوري وغه روغتون ته 21 ژوبل سوي کسان رسول سوي دي.

د تالقان پېښه د کنړ د هغې پيښي څخه يوه اونۍ وروسته رامنځ ته کيږي چي د کنړ د والي په وينا د ناټو عسکرو يوه لس کلنه انجلۍ ووژله او څلور نور ماشومان يې ژوبل کړل.

د شنبې په ورځ بيا ناټو ويلي ول چي د طالبانو د يوه اورپکي د نيولو پر وخت يې په ناپامي کي يو پنځلس کلن هلک ووژی.

د ملگرو ملتونو په ورستي راپور کي ويل سوي ول چي په افغانستان کي د ولسي کسانو د وژنې تر نيمايي څخه زياته پړه د طالبانو په غاړه ده. خو په راپور کي دا هم راغلي ول چي د ناټو په عملياتو کي هم يو شمېر ولسي کسان وژل کيږي.

احمدولي اڅکزی / آژانسونه
کتونکی: مسعود جهش

DW.COM