1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

آلمان او نړۍ

د ايران د اتومي پروگرام په اړه نوې خبري اتري پېل شوې

په قزاقستان کې د ايران د اتومي پروگرام په اړه د امنيت د شورا د پنځو ویتو حق لرونکو غړو، آلمان او ايران تر منځ خبرې اترې پېل شوې دي. لوېديځ هيوادونه هڅه کوي چې ايران د يورانيمو له غني کولو څخه را وگرځوي.

Iran's Chief negotiator Saeed Jalili (R) and European Union Foreign Policy chief Catherine Ashton stand for a photograph before talks in Almaty April 5, 2013. World powers will urge Iran on Friday to accept their offer to ease some economic sanctions if it stops its most sensitive nuclear work, in talks aimed at easing tensions that threaten to boil over into war. REUTERS/Shamil Zhumatov (KAZAKHSTAN - Tags: POLITICS)

Saeed Jalili, Iran, Catherine Ashton

د خبرو اترو تر پیلیدو مخکې لا لوېديځو هيوادونو پر ايران باندې غږ کړی وو چې غوښتنو ته يې مثبت ځوابونه ورکړي. د اروپايي ټولنې د بهرنيو چارو د مسوولې کاترين اشتون وياند مايکل مین، د قزاقستان په پخوانۍ پلازمینه الماتا کې وویل چې ايران ته منصفانه وړانديزونه شوي دي.

په دغو خبرو اترو کې دP5+1 (د ملگرو ملتونو د امنيت د شورا پنځه د ویتو حق لرونکي غړي هیوادونه او آلمان) مشري د اروپايي ټولنې د بهرنيو چارو د مسوولې کاترين اشتون په غاړه ده.

د نوي وړاندیز له مخېP5+1 د ایران د فوردو بټۍ د تړلو له غوښتنې څخه تیریږي. په اوسني وړاندیز کې راغلي دي چې ایران باید په دغه بټۍ کې د يورانيمو د غني کولو سرعت راټيټ کړي. که ايران دغه وړانديز ته مثبت ځواب ورکړي نو د وړانديز له مخي به ورباندې لگول شوي بندیزونه یو څه کم کړل شي. وروستیو بندیزونو په ایران کې یو ډیر پیاوړی اقتصادي کړکیچ رامنځ ته کړی دی.

د ايران د پلاوي مشر سيد جليلي، تر خبرو اترو مخکې يو ځل بيا د خپل هیواد پر هغه دريځ ټينگار کړی وو چې وایي د يورانيمو غني کول د ايران حق دی. جليلي د همدغه دليل پر اساس د فوردو د اتومي بټۍ د تړلو غوښتنې رد کړي دي.

انرژي که اتومي وسلې؟

د کاترين اشتون وياند مايکل مین، غوښتنه کړې ده چې «ايران بايد نړۍ ته دا تضمین ورکړي چې د اتومي انرژۍ له پاره يې لېوالتيا يوازې د سوله یيزو مقصادو له پاره ده او تر شا يې کوم پوځي فکر شتون نه لري.»

لوېديځ پر ايران باندې تور لگوي چې د سوله ییزو اهدافو په نوم د اتومي وسلو د جوړولو په هڅه کې دی. خو ايران دغه تورونه ردوي او وایي چې اتومي پروگرام یې یوازې سوله ییزه او ملکي بڼه لري. نوموړی هيواد د ټولو هغو بنديزونو د ليري کولو غوښتنه کوي، چې د اتومي پروگرام له کبله ورباندې لگول شوي دي. ايران دا غوښتنه هم کوي چې د اتومي انرژۍ د استعمال حق يې په رسمیت وپیژندل شي.

د آلمان د بهرنيو چارو وزير گيدو ويسترویله، د پنجشنبې په ماخستن له خپل ايراني سيال علي اکبر صالحي، سره د تليفون پر کرښه خبرې وکړې. دواړو اړخونو هيله څرگنده کړه چې د الماتا خبرې اترې به مثبتې پايلې ولري.

اسرائيل چي ورته په سیمه کې د يوازني ممکنه اتومي قوت په سترگه کتل کيږي، پر ايران باندې د پوځي بريد گواښ کړی دی. دې هیواد ویلي دي چې که ایران خپل اتومي پروگرام بند نه کړي نو پر دې هیواد باندې پوځي برید هم کیدای شي. د اسرائيل لومړي وزير بنيامين نتنياهو، د متحده ايالتو له سناتورانو سره په ليدنه کې ويلي دي چې ايران بايد هرو مرو خپل اتومي پروگرام ودروي.

د ايران د اتومي پروگرام په اړه روانې خبرې اترې به د شنبې تر ورځې پورې دوام وکړي.